झापा । खेलप्रेमी महिलाहरूलाई लक्षित गर्दै झापा गोल्डकप आयोजक समितिले सदस्यता विस्तारको अभियानलाई अघि बढाएको छ ।
सदस्यता शुल्कमा ५० प्रतिशत छुट गर्दै आयोजक समितिले सदस्य सङ्ख्या बढाउने
निर्णय गरेको हो । झापा गोल्डकपका अध्यक्ष विनोद बस्नेतका अनुसार
महिलाहरूलाई सदस्य बन्न ११ हजार रुपैयाँ निर्धारण गरिएको छ । खेलप्रेमी
महिला दिदीबहिनीहरूलाई पनि झापा गोल्डकपको सदस्य बनाउने उद्देश्यले २१ हजार
रुपैयाँ सदस्यता शुल्कमा छुट गर्दै ११ हजार रुपैयाँ मात्रै कायम गरिएको हो
। छैटौँ संस्करणको तयारीमा रहेको झापा गोल्ड कपको सदस्य सङ्ख्या थप गरेर
महिला सहभागितालाई प्राथमिकता दिइएको कोषाध्यक्ष केदार गिरीले जानकारी दिए ।
प्रतियोगिताको छैटौँ संस्करण यही फागुन १९ गतेदेखि २८ गतेसम्म डोमालाल
राजवंशी रंगशालामा सञ्चालन हुँदैछ ।
यो संस्करणमा कम्तीमा एक सय जना महिला सदस्य सङ्ख्या बढाउँदै संस्थालाई
थप दर्बिलो बनाउने योजना रहेको अध्यक्ष बस्नेतले बताए । यसअघि सदस्यता
लिइसकेका सदस्यहरूको नवीकरण कार्य पनि जारी रहेको गोल्ड कपको सचिवालयले
जनाएको छ । सबै सदस्यहरूलाई समयमै सदस्यता नवीकरण गर्न आग्रह गरिएको
सचिवालय प्रमुख एवम् महासचिव गजेन्द्र पौडेलले जानकारी दिए ।
