झापा / सशस्त्र प्रहरी बल (स.प्र.बल), नेपालले झापाको पूर्वी सीमावर्ती नाकाबाट भन्सार छली अवैध रूपमा नेपाल भित्र्याउँदै गरिएको ठूलो परिमाणको लत्ताकपडा, इलेक्ट्रोनिक्स सामान र दुईवटा सिटी सफारी नियन्त्रणमा लिएको छ। बरामद गरिएका सामान तथा सवारी साधनको कुल भन्सार मूल्य ५ लाख ४५ हजार ६ सय ५० रुपैयाँ कायम गरिएको छ।
गत साउन २१ गते दिउँसो १६:०० बजेको समयमा जिल्लाको मेचीनगर नगरपालिका वडा नं. १५ स्थित बङ्गाल सीमा इलाकामा सशस्त्र प्रहरीको टोलीले विशेष चेकिङ अभियान चलाएको थियो। सशस्त्र प्रहरी बल, नेपाल नं. २ गण हेडक्वार्टर झापाबाट सशस्त्र प्रहरी नायब निरीक्षक (स.प्र.ना.नि.) मुकेश प्याकुरेलको कमाण्डमा खटिएको ९ जनाको मोबाइल टोलीले उक्त सफलता हात पारेको हो। भारतबाट भन्सार छलेर नेपालतर्फ अवैध रूपमा ल्याउँदै गरेको अवस्थामा टोलीले विभिन्न लत्ताकपडा र इलेक्ट्रोनिक्स सामानहरू फेला पारेको थियो। तस्करहरूले सामान ओसार्न प्रयोग गरेका दुईवटा सिटी सफारीलाई पनि प्रहरीले घटनास्थलबाटै नियन्त्रणमा लिएको थियो।
नियन्त्रणमा लिइएका सामान र सवारी साधनहरूलाई आवश्यक कानूनी कारबाहीका लागि साउन २२ गते (शुक्रबार) बिहान ११:५५ बजे भद्रपुर भन्सार कार्यालयमा बुझाइएको छ। भन्सार कार्यालयले बरामद गरिएका सम्पूर्ण सामान र सिटी सफारीको कुल मूल्याङ्कन गरी भन्सार मूल्य ५ लाख ४५ हजार ६ सय ५० रुपैयाँ कायम गरेको जानकारी सशस्त्र प्रहरी बल, नेपाल नं. २ गण हेडक्वार्टर झापाका निमित्त गणपति एवं सशस्त्र प्रहरी नायब उपरीक्षक (डीएसपी) मदन कुमार रसाईलीले दिएका छन्।
निमित्त गणपति डीएसपी मदन कुमार रसाईलीका अनुसार खुला सीमाको फाइदा उठाई हुन सक्ने अवैध चोरी निकासी तथा पैठारीजन्य गतिविधिहरूलाई पूर्ण रूपमा नियन्त्रण गर्न सशस्त्र प्रहरी बलले आफ्नो सक्रियता तीव्र पारेको छ। सीमा नाकाहरूमा कडा निगरानी राखिएकाले आगामी दिनहरूमा पनि भन्सार छली र अवैध तस्करी रोक्न यस्ता चेकिङ र मोबाइल गस्तीहरूलाई निरन्तर जारी राखिने कुरा उनले स्पष्ट पारेका छन्।
