झापा / उदाउँदो सूर्यलाई अर्घ्य दिएसँगै यस वर्षको छठपर्व समापन गरिएको छ । झापाको भद्रपुरस्थित मेची नदी किनारमा पनि हजारौं श्रद्धालु भक्तजनहरूले उदाउँदो सूर्यलाई अर्घ्य दिएका छन्।
शनिबारदेखि सुरु भएको छठपर्व आज बिहानै उदाउँदो सूर्यलाई अर्घ्य दिएपछि समापन भएको हो ।
व्रतालुहरूले हिजो (सोमबार) छठको मुख्य दिन अस्ताउँदो सूर्यलाई अर्घ्य दिएका थिए ।
छठ पर्वका अवसरमा देशका विभिन्न स्थान नदी किनारबाट भक्तजनले आज उदाउँदो सूर्यलाई पूजाआराधना गरी अर्घ दिएका छन्। छठका बर्तालुले कार्तिक शुक्ल चतुर्थीदेखि नै चोखो खानपान गरी शुद्ध भएर बस्ने गर्छन् ।
ऐतिहासिक पौराणिक ग्रन्थ महाभारतमा उल्लेख भएअनुसार द्रोपदीसहित पाँच पाण्डव अज्ञातवासमा रहँदा उक्त गुप्तवास सफलहोस् भनी सूर्यदेवलाई आराधना गरिएको थियो। त्यस समयमा पाण्डव विराट राजाको दरबारमा बास बसेको उल्लेख छ ।
लोक कथनबमोजिम सोही समयदेखि छठ मनाउने परम्पराको थालनी भएको हो। सूर्य पुराणअनुसार सर्वप्रथम अत्रिमुनिकी पत्नी अनुसूयाले छठ व्रत गर्नुभएको थियो । फलस्वरूप उहाँले अटल सौभाग्य र पतिप्रेम प्राप्त गर्नुभयो । त्यही बेलादेखि ‘छठ पर्व’ मनाउने परम्पराको सुरुआत भएको किम्वदन्ती रहेको छ ।
छठ पर्वमा व्रत गरे दुःख र दरिद्रताबाट मुक्ति पाइन्छ भन्ने जनविश्वास छ। यसमा झुप्पा–झुप्पा फल चढाउँदा सूर्य देवता प्रसन्न भई व्रतालुका कुटुम्बसहित सबै सन्तानको भलो हुन्छ भन्ने मान्यता पाइन्छ। हिजो षष्ठीका दिन रातभर जागा बसी आज कार्तिक शुक्ल सप्तमीका दिन बिहान उदाउँदो सूर्यलाई पूजाआराधना गरी विधिपूर्वक अर्घ्य दिएसँगै यो पर्व समापन भएको छ ।
