झापा / झापाको दमक नगरपालिका–२ स्थित एक घरमा चोरी भएको घटनामा संलग्न रहेको आरोपमा प्रहरीले एक युवकलाई पक्राउ गरेको छ।
जिल्ला प्रहरी कार्यालय झापाका अनुसार दमक नगरपालिका–२ बस्ने ३३ वर्षीया मनिषा तामाङको घरमा कोही नभएको मौका छोपी प्रवेश गरी दराज फुटाएर सुनका विभिन्न गरगहना र नगद चोरी भएको थियो। चोरी भएका सामानमा सुनको सिक्री १ थान, बच्चाको तीन तोलाको सुनको चुरा २ थान, सुनको पिजडा २ थान, सुनको तिलहरी १ थान तथा नगद २० हजार रुपैयाँ रहेको प्रहरीले जनाएको छ।
घटनाबारे जानकारी प्राप्त भएपछि इलाका प्रहरी कार्यालय दमकबाट खटिएको प्रहरी टोलीले घटनास्थल तथा आसपासका क्षेत्रमा रहेका सीसीटीभी फुटेजको समेत अध्ययन गरी अनुसन्धान अघि बढाएको थियो।
अनुसन्धानका क्रममा प्रहरीले पाँचथरको फिदिम नगरपालिका–४, रवि घर भई हाल झापाको दमक नगरपालिका–५ मा डेरा गरी बस्ने १९ वर्षीय दिपक राईलाई पक्राउ गरेको जनाएको छ।
राईको साथबाट नगद ७९ हजार रुपैयाँ, चाँदीको पाउजु १ थान, सुनको पिजडा २ थान र सुनको श्रीबन्दी १ थान फेला परेको प्रहरीले जनाएको छ। पक्राउ परेका राईलाई इलाका प्रहरी कार्यालय दमकमा राखी घटनाबारे थप अनुसन्धान भइरहेको जिल्ला प्रहरी कार्यालय झापाले जनाएको छ।
