झापा / माेरङकाे कानेपाेखरी ६ सिताधापमा रहेकाे सिता खाेला छेउमा बनेकाे कल्भर्ट यतिखेर खाेलाकाे पर्खाइमा बसेकाे छ ।
पालिकाले पूर्वाधार विकास शीर्षकबाट २१ लाख १० हजार २२३ रुपैयाँ
ठेक्कामा बनाएको सीताखोलाको कल्भर्टमुनि खोला छैन, झट्ट हेर्दा लाग्छ कल्भर्ट बनिसकेर बसेकाे छ । अब खाेला कहिले आउँछ भनेर उ कुरेर बसेकाे छ ।
विकास निर्माणमा हुने बेथितिको हद वेलावेला सार्वजनिक हुनु नेपालमा नौलो कुरा होइन । यस्तै बेथिति मोरङको कानेपोखरी–६ सीताधापको सीता खोलामा कल्भर्ट निर्माणमा पनि देखिएको छ ।
कानेपोखरी गाउँपालिकाको कार्यालय तथा वडा कार्यालय आवतजावत गर्न सीताधापका बासिन्दालाई सहज होस् भनी बनाइएको पुल मानिस आवतजावत गर्न होइन, जिस्क्याउन बनाएजस्तै छ । बनाएको संरचना हेर्दा मसानघाटजस्तो देखिएकाे छ ।
‘पुल त बनाइस् भन्दा बनाएँ भनेजस्तै मात्रै भयो,’ स्थानीय शान्ता मगरले भनिन्, ‘मैले धेरैपटक पालिकामा र वडाध्यक्षलाई भने, उहाँहरूले काम हुन्छ नआत्तिनु भन्नुभएको छ ।
स्थानीयले माग गरेपछि आर्थिक वर्ष २०८०/८१ मा पालिकाले यसका लागि २५ लाख रुपैयाँ बजेट विनियोजन गरेको थियो । मोरङ रंगेलीको आकृति कन्स्ट्रक्सनले यस पुलका लागि २१ लाख १० हजार २२३ रुपैयाँमा ठेक्का सखारेको थियो । उसले २०८० चैतमा निर्माण सुरु गरेको थियो । कम्पनीले १९ लाख ६० हजार ३ रुपैयाँ भुक्तानी लिइसकेको छ । तर स्थलगत अवस्था हेर्दा खोलाको पुल निर्माणको काम २५ प्रतिशत पनि भएको छैन ।
स्थानीय पदमकुमारी विश्वकर्माको दैनिकी त्यही खोला तरेर जङ्गलमा घाँस दाउरा गर्नु हो । तर, कहिल्यै उनी पुल प्रयोग गर्दिनन् । किनकि पुल भएर वारपार गर्ने अवस्था नै छैन । ‘खोलामा बाढी आउँदा यहाँबाट कसरी हिँड्नु ? वैशाखको अन्त्यमै मनग्गे पानी बगिरहेको खोला वर्षामा बाढी आउँदा तर्नै नसक्ने हुन्छ,’ विश्वकर्माले भनिन्, ‘पुल बनाउन बजेट कति के थियो हामी जान्दैनौँ । तर यो पुलबाट हामी हिँडेका छैनौँ, हिँड्न सक्ने अवस्था पनि छैन ।’
पुल नहुँदा सीताधापका लगभग ३० घर वर्षायाममा पालिकाको सेवाबाट वञ्चितजस्तै हुन्छन् । सरकारी कामका लागि उनीहरू त्यही खोला तरेर कानेपोखरी वडा नम्बर ६ को कार्यालयसम्म पुग्नुपर्छ । ‘यो ठाउँ नै अन्यायमा परेको छ,’ मगर भन्छिन् ।
कानेपोखरी गाउँपालिकाकी प्रमुख प्रशासकीय अधिकृत हीराकुमारी यादव आफू अनुगमनमा जाँदा छक्क परेको बताउँछिन् । ‘म अनुगमनमा गएको थिएँ, त्यो काम देखेर छक्क परें,’ उनले भनिन्, ‘यसलाई थप रकम विनियोजन गरेर काम गर्नुपर्ने देखिएपछि चालु आर्थिक वर्षमा पनि बजेट राखेका छौँ । अब थप टेन्डर आह्वान हुन्छ ।’ उनले कल्भर्टको दुवै साइडमा तारजाली लगाउने, होमपाइप राख्ने र माटो पुर्ने काम बाँकी भएको बताइन् । जसका लागि थप ३३ लाख रुपैयाँ आवश्यक पर्ने बताइएको छ ।
चालु आर्थिक वर्षमा यसका लागि थप २५ लाख रुपैयाँ बजेट विनियोजन भएको छ । प्राविधिक हिसाबले अब सीधाप खोलाको कल्भर्ट निर्माणमा कुल ५३ लाख रुपैयाँभन्दा बढी खर्च हुनेछ । यति ठुलो लगानी गरेर पनि त्यो पुल निर्माण सम्पन्न हुनेमा भने स्थानीय आशङ्का गर्छन् ।
समाचार स्राेत राताेपाटी
