झापा / काठमाडौं महानगरपालिकाको कार्यपालिका बैठक शुक्रबार बस्दैछ । शुक्रबार दिउँसो २ बजे बस्नेगरी मेयर बालेन शाहले कार्यपालिका बैठक बोलाएका छन् ।
उपमेयर सुनिता डंगोल र केही वडाध्यक्षहरूले लगातार छलफल गरेपछि मेयर बालेन प्रमुख प्रशासकीय अधिकृत गुरागाईंलाई बिदामा राखेर कार्यपालिका बैठक बोलाउने पक्षमा थिए, तर शुक्रबार भने प्रमुख प्रशासकीय अधिकृत गुरागाइलाई सँगै राखेर बैठक बस्न बालेन तयार भएका मेयर बालेनको सचिवालयले जनाएको छ।
काठमाडौं महानगरले नीति तथा कार्यक्रम र बजेट ल्याएको छैन । स्थानीयय सरकार सञ्चालन ऐन अनुसार स्थानीय तहले असार १० गतेभित्र बजेट ल्याइसक्नुपर्ने उल्लेख छ। तर मेयर बालेन र प्रमुख प्रशासकीय अधिकृत सरोज गुरागाईंबीचको द्वन्द्वका कारण कार्यपालिका बैठक बस्न नसक्दा तोकिएकै समयमा बजेट ल्याउन महानगर असफल भएको थियो ।
दिउँसो २ बजे बस्ने कार्यपालिका बैठकमा प्रमुख प्रशासकीय अधिकृतसहित सबै सदस्यहरूलाई कार्यपालिका बैठकका लागि आमन्त्रण गरिएको मेयर बालेनका स्वकीय सचिव भूपदेव शाहले जानकारी दिए ।
प्रमुख प्रशासकीय अधिकृत गुरागाईंले पनि बैठकका लागि मेयर बालेनले बोलाएको बताए। 'म अहिले अफिस जाँदै छु । बैठकका लागि मेयर साबले बोलाउनुभएको छ। पहिले पनि बाधक बन्दिन भनेको थिएँ,' उनले भने ।
आज कार्यपालिका बैठकअघि बिहान ११ बजे बजेट निर्धारण सिमा समितिको बैठक बस्नेछ। मेयर नेतृत्वमा रहेको उक्त समितिमा प्रमुख प्रशासकीय अधिकृत सदस्य सचिव रहन्छन् । बजेट निर्धारण सिमा समितिको बैठकपछि उपमेयर नेतृत्वको बजेट तथा कार्यक्रम तर्जुमा समितिको बैठक बस्नेछ।
त्यसपछि कार्यपालिको बैठक बस्नेछ। कार्यपालिका बैठकमा विभिन्न विभागहरूबाट ल्याएका प्रस्तावहरू पेस हुनेछ ।
त्यसपछि नीति तथा कार्यक्रम प्रस्तुत गर्ने छलफल गर्ने कार्यसूची रहको मेयर बालेनका स्वकीय सचिव शाहले जानकारी दिए।
आजकै कार्यपालिका बैठकले नगर सभा बोलाउन मिति तय गर्नेछ।
