भद्रपुरमा गाई गोरुको मासु खाएको प्रति नगरपालिकाको ध्यानाकर्षण(विज्ञप्तिसहित)

झापा । झापाको सदरमुकाम भद्रपुरमा गाई गोरुको मासु खाएको भन्दै त्यस घटनाप्रति भद्रपुर नगरपालिकाको गम्भीर ध्यानाकर्षण भएको छ । शनिबार दिउँसो भद्रपुर– ४ रंगेझोडास्थित देउनियाँ खोलाको डिल नजिकै एउटा समूहले गाई गोरुको मासु पकाएर सामूहिक भोज खादै गरेको भिडियो सामाजिक सञ्जालमा हालेपछि नगरपालिकाको गम्भीर ध्यानाकर्षण भएको हो । 
नगरपालिका नगर प्रमुख गणेश पोखरेलले सोमबार एक विज्ञप्ति जारी गर्दै सामाजिक सद्भाव र सहिष्णुता भड्काउने कानुनविपरीतका विचार र अभिव्यक्तिहरू सामाजिक सञ्जालमा नराखिदिन अपिल गरेका छन् ।

मुलुकी अपराध (संहिता) ऐन २०७४ को दफा २८९ मा गाईगोरु मार्न या कुट्न नहुने उल्लेख गरेको छ । सोही दफाको उपदफा २ मा गाईगोरु मार्नलाई तीन वर्ष सम्म कैद हुने व्यवस्था गरिएको छ । त्यस्तै कसैले गाई वा गोरुलाई कुटी अङ्गभङ्ग पारेमा निजलाई ६ महिनासम्म कैद र अन्य चोट पुराएमा ५० हजार रुपैयाँ सम्म जरिबाना हुने उपदफा ३ मा प्रस्ट भनिएको छ ।