झापा जिल्लामा पछिल्लो समय सम्बन्धविच्छेदका घटना बढ्दै गएको छ । झापा जिल्ला अदालतको पछिल्लो तथ्याङ्कले त्यस्तो देखाएको हो ।सामाजिक संरचना, बसाइँसराइ, आधुनिक जीवनशैली, आर्थिक अवस्थाका कारण सम्बन्धविच्छेदको घटना बढेको देखिन्छ ।अदालतका सूचना अधिकारी रामचन्द्र बस्नेतका अनुसार आर्थिक वर्ष २०८२/८३ मा सम्बन्धविच्छेद सम्बन्धी १६७० वटा मुद्दाको लगत रहेको छ । अघिल्लो आर्थिक वर्षबाट सरी आएका र नयाँ दर्ता भएका सम्बन्धविच्छेदका त्यति मुद्धामध्ये १३४९ वटा फर्छ्यौट भएको छ ।बाँकी ३२१ वटा मुद्दा विचाराधीन रहेको सूचना अधिकारी बस्नेतले बताए ।
झापा जिल्ला अदालतमा पछिल्लो तीन वर्षको अवधिमा सबैभन्दा बढी सम्बन्धविच्छेदका मुद्दा दर्ता भएका छन् ।आर्थिक वर्ष २०८० साउन १ देखि २०८३ असार मसान्तसम्मको अवधिमा कुल ३ हजार ९ सय वटा सम्बन्धविच्छेदका मुद्दा दर्ता भएका हुन् ।
दर्ता भएकामध्ये २ हजार ३ सय ६० वटा मुद्दा दुवै पक्षको आपसी सहमतिमा मिलापत्र गराइएको छ भने १ हजार ५ सय ४० वटा मुद्दा अदालतबाट फैसला भइसकेका छन् ।
अदालतका सूचना अधिकारी बस्नेतका अनुसार पछिल्लो दुई आर्थिक वर्ष (आव२०८१/८२ र २०८२/८३) मा मात्रै २ हजार ७ सय १४ वटा सम्बन्धविच्छेदका मुद्दा दर्ता भएका थिए ।जसमध्ये १हजार ६ सय ५१ वटा मुद्दामा मिलापत्र गराइएको थियो ।
त्यस्तै, गत आर्थिक वर्ष २०८२/८३ को एक वर्षको अवधिमा १हजार ३ सय७३ वटा मुद्दा दर्ता भएकोमा ८ सय १६ वटा मिलापत्रमार्फत टुंगिएका छन् भने ३ सय७९ वटा मुद्दा फैसला भएका छन् । विशेष गरी घरायसी विवाद, वैदेशिक रोजगारी र संवैधानिक अधिकारप्रतिको चेतनाका कारण पछिल्लो समय समाजमा सम्बन्धविच्छेदका मुद्दा बढ्दो क्रममा रहेको सूचना अधिकारी बस्नेतले जानकारी दिए ।
सम्बन्धविच्छेदका मुद्दा बढिरहँदा फैसला कार्यान्वयनतर्फ भने झापा जिल्ला अदालतले उल्लेख्य प्रगति हासिल गरेको छ ।
आर्थिक वर्ष २०८२/८३ मा फैसला कार्यान्वयनतर्फ वार्षिक ९ सय ८५ वटा मुद्दा फर्छ्यौट गर्ने लक्ष्य राखिएकोमा लक्ष्य नाघेर १हजार २ सय २८ वटा मुद्दा फछ्र्यौट भएका छन् ।अदालतका अनुसार यो कुल लक्ष्यको १२४.६७ प्रतिशत प्रगति हो ।
