झापा । झापाको बिर्तामोडबाट बुधवार विहान वेपत्ता भएका दुई बालिका ६ घण्टापछि फेला परेका छन् । विहान ११ बजेबाट सम्पर्कविहीन भएका दुई बालिकालाई साँझ पाँच बजे फेला पारेको बुबा निशान निरौलाले जानकारी दिए ।
बिर्तामोड-५ लालीगुराँस टोलका दुई बालिका विहान ११ बजेदेखि परिवारको सम्पर्कभन्दा बाहिर भएपछि परिवारले इलाका प्रहरी कार्यालय बिर्तामोडलाई जानकारी गराएका थिए ।
सात वर्षीया हिमानी निरौला र पाँच वर्षीया अबजना पौडेल एकसाथ हराएका थिए । परिवारले बच्चाहरुलाई स्थानीय सोधीखोजी गर्दैगर्दा आफन्तले नै देखेर सम्पर्क गरेको बताए ।
आफन्तको घरमा समेत गएको नभेटिएकाले प्रहरीले पनि सार्वजनिक सूचना मार्फत उनीहरुको खोजीमा सघाउन आग्रह गरेको थियो ।
