झापा । गणेश चौथीका दिन चोरी र बिगार गर्नेलाई कानुनले छुट नदिने भएकाे छ । गणेश चौथीका दिन चोरे पनि पाप र दोष लाग्दैन भन्दै चाेरी गरेमा कारबाही गरिने जिल्ला प्रहरी कार्यालयका प्रवक्ता डीएसपी कृष्णकुमार चन्दले बताए । त्यस्ता गलत प्रचलनलाई छोड्दै जानुपर्ने भन्दै उनले गणेश चौथीका दिन चोरेपनि कानुनको नजरमा ऊ दोषी ठहरिने बताए । सुनेको र भनेको भरमा त्यस्ता क्रियाकलाप नगर्न उनले अनुरोध गरेका छन् ।
चोरी गर्ने भनिएपछि छिमेकीका कुखुरा, काँक्रो, फलफूल, खसीबाख्रा, हाँस, परेवा जेजे भेटिन्छ, त्यो मनोरञ्जनको हिसाबले चोर्ने वा त्यसमा क्षति गर्ने नेपाली समाजमा गलत प्रचलन अझै कायम छ । केवल राति जाने र चोर्नेमात्र दिमागमा लिएर प्रायः युवा पुस्ता हिँड्ने गर्दछन् ।
