सिंहदरबारमा आइतबार जारी बैठकमा दलहरुले समितिको कार्यक्षेत्रका विषयमा सहमति जुटाउन नसक्दा प्रतिनिधि सभाको बैठक सुचारु भएकाे छैन।
सभामुख देवराज घिमिरेको सचिवालयका अनुसार नेपाली कांग्रेसका प्रमुख सचेतक रमेश लेखक समितिको कार्यक्षेत्रसम्बन्धी विवाद मिलाउन नयाँ बानेश्वरबाट सिंहदरबारतर्फ लागेका छन्।
'उहाँले संसदीय छानबिन समितिको कार्यक्षेत्रको विषय टुङ्गो नलाग्दासम्म बैठक नचलाउँ भनेर सभामुखलाई भन्नुभयो,’ सभामुखका प्रेस विज्ञ शेखर अधिकारीले भने, 'कार्यक्षेत्रको विषय टुंगो नलाग्दा बैठक अघि बढ्ने अवस्था छैन।
प्रतिनिधि सभा बैठक आइतबार बिहान ११ बजेका लागि बोलाइएको थियो।
प्रमुख दलहरुहरुको शनिबार बसेको बैठकले सहकारी ठगीबारे संसदीय छानबिन समिति बनाउने सहमति जुटाएको थियो।समितिको कार्यक्षेत्र टुङ्गो लगाउन कानुन मन्त्री पदम गिरीको संयोजकत्वमा कांग्रेसका जीवन परियार, एमालेका महेश बर्तौला र रास्वपाका शिशिर खनाल रहेको कार्यदल गठन भएको थियो।
संसदीय छानबिन समितिको क्षेत्राधिकारमा अनिवार्य रुपमा गृहमन्त्री लामिछानेको नाम उल्लेख गर्नुपर्ने अडान कांग्रेसले राख्दै आएको छ।
राष्ट्रिय स्वतन्त्र पार्टीले गृहमन्त्रीको नाम उल्लेख गर्न नहुने बताएको छ। एमालेले भने संसदीय छानबिन समिति व्यक्ति तोकेर बन्न नहुने बताउँदै आएको छ।
समितिको कार्यक्षेत्रको विवादले प्रतिनिधि सभाको बैठक अनिश्चित बनेको हो।
