झापा / मेचीनगर ६ काँकरभिट्टास्थित अरुणोदय माध्यमिक विद्यालय परिसरको भवनमा शिक्षिकाको शव भेटिएको छ । शिक्षिका कविताकुमारी ढुंगानाको सड्न लागेको अवस्थामा शव फेला परेको हो । आफ्नी श्रीमतीको शव रहेको कोठा बाहिरबाट ताला लगाएर श्रीमान शिक्षक रतन गुप्ता भने फरार रहेका छन् ।
गत बैशाख महिनादेखि अरुणोदय माविमा पर्सा बीरगंज १६ बस्ने ३० वर्षीय रतन गुप्ता र उनकी श्रीमती सर्लाही लालबन्दी २ बस्ने २९ वर्षीया कबिता कुमारी ढुङ्गाना सोही स्कुलको एउटा कोठामा बसेर पढाउँदै आएका थिए । साउन ५ गतेदेखि स्कुल बिदा भई आज संचालन भएकोमा स्कुल खोल्दा उनीहरु दुबै जना थिएनन् । उनीहरुको कोठामा ताल्चा लगाएको थियो भने फोन गर्दा दुबैसँग सम्पर्क हुन सकेको थिएन । दिउँसो ४ः३० बजे स्कुलको प्रिन्सिपललाई रतन गुप्ताले आफ्नो श्रीमती किचन रुममा गई झुण्डिएको अवस्थामा फेला परेको ब्यहोराको म्यासेज गरेका थिए ।
प्रिन्सिपल दुर्गाबहादुर लुईटेलको वाट्सएपमा शिक्षक गुप्ताको म्यासेज आएको थियो । उनले म्यासेजमा श्रीमती ढुंगानाले कोठामा झुन्डिएर आत्महत्या गरेको र आफूले बोकेर अर्को कोठामा सारेको लेखेका थिए । डरले कसैलाई नभनी आफू दुईवटा झोला बोकेर हिडेको बताउँदै उनले ताला खोलेर कोठाभित्र रहेको शवको कानुनी प्रक्रिया पूरा गर्नु भनेका थिए । स्थानीयले शिक्षक गुप्तालाई आइतबार साँझ करिव ५ वजे २ वटा झोला बोकेर स्कुलबाट बाहिर निस्केको देखेको बताइएको छ ।
इलाका प्रहरी कार्यालय काँकरभिट्टाको टोलीले घटनाका विषयमा अनुसन्धान गरिरहेको जनाएको छ ।
