झापा ।
झापाको भद्रपुरमा कोशी प्रदेशस्तरीय पुरुष खुला डबल्स तथा भेट्रान्स
डबल्स ब्याडमिन्टन प्रतियोगिता सुरू भएकाे छ । भदौ २८ गतेदेखि ३० गतेसम्म भद्रपुरको मेची रंगशालामा रहेको कभर्ड हलमा सञ्चालन प्रतियोगिता शुक्रबार विहानबाट सुरू भएकाे हाे । कार्यक्रममा प्रमुख अतिथि नगर प्रमुख गणेश पाेखरेल र झापाका प्रमुख जिल्ला अधिकारी वन्धुप्रसाद वास्ताेलाले ब्याडमिन्टन खेलेर उदघाटन गरेका थिए ।
आयोजक झापा जिल्ला ब्याडमिन्टन संघका अध्यक्ष दिपेश ढकालकाे सभापतित्व एवम नगर प्रमुख पाेखरेलकाे प्रमुख आतिथ्यमा सुरू भएकाे कार्यक्रममा पुरुष खुला डबल्समा २१ जोडी र भेट्रान्स डबल्समा २६ जोडीले प्रतियोगितामा भाग लिनेछन् । प्रतियोगिता पुरुष डबल्स र भेट्रान्स डबल्स (१०० प्लस) गरी दुई विधामा सञ्चालन हुनेछ । प्रतियोगितामा नेपालका उत्कृष्ट १६ र्यांकिङ खेलाडीले भने भाग लिन पाउने छैनन् ।
भेट्रान्स डबल्स विधामा भने ४५ वर्ष उमेरमाथिका खेलाडीले मात्र सहभागिता जनाउन पाउने अध्यक्ष ढकालले जानकारी दिए ।
प्रतियोगिताका खुलातर्फका विजेताले नगद ५० हजार रुपैयाँ, ट्रफी र मेडल पाउने संघका अध्यक्ष ढकालले जानकारी दिए । त्यस्तै, दोस्रो हुनेले नगद ३० हजार र तेस्रो हुनेले नगद १०–१० हजार, ट्रफी र मेडल प्राप्त गर्ने छन् ।
भेट्रान्सतर्फका विजेताले नगद ४० हजार रुपैयाँ, ट्रफी र मेडल पाउँदा दोस्रो हुनेले नगद ३० हजार रुपैयाँ, ट्रफी र मेडल तथा तेस्रो हुनेले नगद १०/१० हजार रुपैयाँ, ट्रफी र मेडल पाउने छन् ।
पहिलोपटक सञ्चालनमा आएकाे प्रतियोगितालाई सलोनी टि कपले प्रायोजन गरेको अध्यक्ष ढकालले जानकारी दिए ।
