झापा । काँग्रेस कार्यकर्ताहरुको भोटले चुनाव जित्ने साेच बनाएर झापा ३ मा बिर्तामाेड १० गाभेका नेता कृष्णप्रसाद सिटाैलाकाे याेजना फेल खाएकाे छ । बत्तीमुनिको अँध्यारो भनेजस्तै विकास निर्माणको हिसाबले साे वडा बिगत ८ वर्षदेखि ओझेलमा परेको वडावासीले गुनासाे गरेका छन् ।
२०७४ मंसिर १० गतेको निर्वाचनमा झापा ३ बाट उम्मेदवार बनेका कांग्रेसका पूर्व महामन्त्री सिटौलाले निर्वाचनको मुखमा बिर्तामोडको १० नं वडालाई नगरपालिकाबाट अलग्याएर क्षेत्र नं ३ मा गाभ्न लगाए ।
उनको निजी स्वार्थ थियो – बिर्तामोड १० मा भएका कांग्रेस कार्यकर्ताहरुको भोटले चुनाव जित्ने । तर, निर्वाचनको परिणाम उल्टो आयो । २०७४ सालको निर्वाचनमा ४४ हजार ६१४ मतसहित राप्रपा अध्यक्ष राजेन्द्र लिङ्देन निर्वाचित हुँदा सिटौलाको पक्षमा ३१ हजार १७१ मत परेको थियो ।
२०७० सालदेखि लिङ्देनसंग लगातार भिड्दै आएका सिटौला २०७९ को निर्वाचनमा फेरि झापा ३ मा उम्मेदवार बने । त्यस निर्वाचनमा पनि उनी पराजित भए । लिङ्देनले ४० हजार ६४८ मतसहित आफ्ना निकटतम् प्रतिद्वन्द्वी सिटौलालाई पराजित गरेका थिए । सिटौलाले ३७ हजार ३७२ मत ल्याएका थिए ।
बिर्तामोड नगरपालिकाको भूगोलबाट १० नं वडालाई अलग्याउँदा सिटौलालाई सोचेजस्तो फाइदा भएन । तर, बिर्तामोड १० का वडाबासीहरुलाई भने ठूलो घाटा भयो । बिर्तामोड नगरपालिकाको १० वटा वडामध्ये १ देखि ९ सम्म ९ वटा वडा क्षेत्र नं २ मा पर्दा १० नं वडालाई अलग्याएर क्षेत्र नं ३ मा पारिएको थियो ।
बिर्तामोड १० मा जे जति विकास भएको छ ,
त्यो सबै नगरपालिकाको बजेटबाट भएको हो । ३ नं क्षेत्रबाट जितेर गएका
सांसदले बिर्तामोड १० का लागि खासै विकास नगरेको साे क्षेत्रका जनताकाे गुनासो छ ।
