झापाको गौरीगञ्ज गाउँपालिका–१ नं वडा कार्यालयमा कार्यरत वडा सचिव अजयकुमार साह दश हजार घुससहित रंगेहात पक्राउ परेका छन् ।
अख्तियार दुरुपयोग अनुसन्धान आयोगको टोलीले उनलाई पक्राउ गरेको हो । गौरीगञ्ज गाउँपालिका वडा नं. १ मा कार्यरत वडा सचिव साहले सम्बन्ध विच्छेद दर्ता प्रमाणपत्र जारी गर्नका लागि सेवाग्राहीलाई दुःख दिई घुस माग गरेको भन्ने उजुरीका आधारमा अख्तियार दुरुपयोग अनुसन्धान आयोगको कार्यालय, इटहरीबाट टोली खटिएको थियो ।
वडा सचिव साहलाई सेवाग्राहीबाट दश हजार रुपैयाँ घुस लिइसकेको अवस्थामा उक्त रकमसहित सोही वडाको कुञ्जीबारी बजारको एक होटलबाट आज रंगेहात पक्राउ गरिएको हो । उनीमाथि थप अनुसन्धान भइरहेको अख्तियार दुरुपयोग अनुसन्धान आयोगले जनाएको छ ।
