झापा । बिर्तामोड नगरपालिकामा कर्मचारीतन्त्रको रवैया र
गुटबन्दीका बारेमा धेरै सेवाग्राहीहरुले गुनासो गरिरहँदा त्यसकै कारण
आफूले सरुवा लिएर गएको प्रमुख प्रशासकीय अधिकृत राधाकृष्ण खतिवडाले खुलासा
गरेका छन् ।
झापाको चन्द्रगढी घर भएका खतिवडाले बिर्तामोडमा लामो समय काम गर्ने
सोच बनाएका थिए । तर, काम गर्ने वातावरण नै नभएपछि छ महिनामै आफूले सरुवा
लिएर जिल्ला समन्वय समिति भक्तपुर आएको उनले बताए । जनप्रतिनिधिभन्दा
कर्मचारीहरुकै कारण आफूले काम गर्न नसकेको उनको भनाई छ । ‘जनप्रतिनिधिहरुले
सहयोग नै गर्नुभएको थियो ’ उनले भने ,‘ कर्मचारी र बाहिरी हस्तक्षेपका
कारण काम गर्ने वातावरण छैन ।’ बिर्तामोड नगरपालिकामा यसअघिका प्रमुख
प्रशासकीय अधिकृतहरु पशुपति खतिवडा र विनोद न्यौपानेले मात्र टिकेर काम
गर्न सकेका थिए । राधाकृष्ण खतिवडाजस्तै गणेश दाहालले पनि टिकेर काम गर्न
सकेनन् ।
बिर्तामोड नगरपालिकामा जनप्रतिनिधिभन्दा कर्मचारीहरु हावी भएको गुनासो
छ । नगरपालिकामा कर्मचारीहरुको तीनवटा गुट देखिएको र गुटगत राजनीतिका कारण
कार्यालयको कामकाज र सेवाग्राहीहरुको सेवा प्रभावित हुने गरेको बताइएको छ ।
गुटबन्दीका कारण एउटा शाखा हेर्ने शाखा प्रमुखले अर्को शाखा प्रमुखसंग
बोलचाल नै नगरेको पाइएको छ । खतिवडा दशैअघि सरुवा भएर गएका हुन् । अब नयाँ
प्रमुख प्रशासकीय अधिकृत को आउने भनेर टुंगो लागेको छैन । प्रतिदिनबाट
