झापा । आउँदै गरेका चाडपर्वलाइ लक्षीत गरी झापाका नाकामा तस्करी मौलाएको छ । झापाका मुख्य नाका काँकडभिट्टा,भद्रपुर,केचना,झापा बजार,राजगढ लगायतका नाकामा तस्करी हुने गरेको विभिन्न घटनाले पुष्टि गरेको छ ।
एक महिना अघि झापाको टिमाइ नाकाबाट १२ लाख मूल्य बराबरको सामान बरामद गरेको सशस्त्र प्रहरीले आज पुनः काँकडभिट्टा नाकाबाट १० लाख मूल्य बराबरको लत्ताकपडा बरामद गरेको सो कार्यालयले जनाएको छ । यसरी सशस्त्र प्रहरीले सामान बरामद गरेपछि झापामा तस्करी मौलाइ्रएको पुष्टि हुन्छ ।
सशस्त्र प्रहरी बोर्डर आउट पोष्ट वाहुण्डाँगीबाट खटिएको गस्ती टोलीले मङ्गलबार साँझ मेचीनगर २ भृकुटी चोक दक्षिण पिपल चोकमा भन्सार छलि अवैध रुपमा भारतबाट नेपाल भित्र्याउदै गरेको लत्ताकपडा बरामद गरिएको सशस्त्र प्रहरी बल नेपाल नम्बर २ गण झापाका डिएसपी एवम सूचना अधिकारी सुमन पोखरेलले जानकारी दिए । विषेश सूचनाका आधारमा गएको प्रहरी टोलीले कुर्ता र पाइजामा १३५ सेट, जेन्स भेष्ट २०० थान,कुर्ताको कपडा ३२० मीटर,ब्लाउजको सादा कपडा ४०० मीटर, २÷२ ब्लाउजको कपडा २१६ मीटर गरी अन्दाजी १० लाख मूल्य बराबरको सामान बरामद गरिएको डिएसपी पोखरेलले बताए । बरामद सामानलाइ प्रक्रिया पूरा गरी मेची भन्सार कार्यालय काँकडभिट्टा बुझाइने पोखरेलले बताए ।
यता भद्रपुर नाकामा भने सशस्त्र प्रहरीले साना व्यापारीलाई दुःख दिएर ठूला व्यापारीलाइ छाड्ने गरेको गुनासो आएको छ । नेपाल – भारतको सीमा मेची पुलको सवैभन्दा पहिलो चेकजाँचमा भद्रपुरमा रहेको सशस्त्र प्रहरी टोली खटिदै आइरहेको छ । एक महिना अघि कार्यभार सम्हाल्दै आएका डिएसपीप्रति साना व्यापारीले गुनासो गर्दै आइरहेका छन् ।
