झापा । कचनकवलका इँटाभट्टा उद्योगहरूलाई गाउँपालिकाले करको दायरामा ल्याउन नसकेकाे पाइएकाे छ । पालिका भित्र सञ्चालित उद्दाेगमध्ये तीन वटा इँटा उद्योगले २ लाख ४५ हजार रुपैयाँ गाउँपालिकालाई तिर्नुपर्ने रकम बक्यौता देखिएको महालेखा परीक्षकको कार्यालयको प्रतिवेदनमा उल्लेख गरेपछि रहस्य सार्वजनिक भएकाे हाे । गाउँपालिकाको विभिन्न वर्षका आर्थिक ऐनमा इँटाभट्टालाई तोकिएको दरमा कर लगाई असुल उपर गरिने उल्लेख छ । तोकिएको दरमा कर भुक्तानी दिने तथा असुल गर्ने दुवै पक्षको कर्तव्य तथा दायित्व रहन्छ । गाउँपालिकाले बक्यौता रकममा आर्थिक ऐन अनुसार जरिवानासमेत असुल उपर गर्नुपर्ने प्रतिवेदनमा भनिएको छ । प्रतिवेदन अनुसार चण्डी इँटाभट्टाले २०७५/७६ को १५ हजार, ०७६/०७७ देखि ०७८/०७९ चार वर्षको वार्षिक २५ हजारको दरले एक लाख रुपैयाँ र ०७९/८० को ३५ हजार गरी जम्मा १ लाख ५० हजार तिर्न बाँकी देखिएको छ ।
त्यस्तै स्टार इँटाभट्टाले ०७८/७९ को २५ हजार र ०७९/८० को ३५ हजार गरी
६० हजार तिर्न बाकी देखिएकोमा एसआईबी इँटाभट्टा (एक चिम्नीको बाँकी) ०७९।८०
को ३५ हजार गाउँपालिकालाई तिर्नु पर्ने उल्लेख छ ।
जथाभाबी खेतीयोग्य जमिन दोहन गर्दै आइरहेको कचनकवलका
इँटाभट्टा उद्योगहरूलाई गाउँपालिकाले नियमन गर्न सकिरहेकाे छैन । सञ्चालकहरूले लामो समयदेखि पालिकालाई कर नबुझाउँदा पनि
जनप्रतिनिधि र कर्मचारीले त्यसप्रति खासै चासो देखाएका छैनन ।
