वर्षायाम शुरु हुँदै गर्दा झापामा पानीमा डुबेर दुईजनाको मृत्यु भएको छ ।मेचीनगर र गौरीगंजमा सडकको नालीमा डुबेर दुईजना पुरुषको मृत्यु भएको हो । आज दिउँसो २ बजे मेचीनगर नगरपालिका वडा नम्बर ७ इटाभट्टास्थित निर्माणाधीन एसियन हाइवेको किनारमा जमेको पानीमा डुबेर सोही ठाउँ. बस्ने ६० वर्षीय गणेश बस्नेतको मृत्यु भएको हो । इलाका प्रहरी कार्यालय काँकडभिट्टाको टोलीले कानुनी प्रक्रिया पुरा गरी शव पोस्टमार्टमको लागि प्रादेशिक अस्पताल भद्रपुर पठाएको छ । प्रारम्भिक अनुसन्धानको क्रममा मृतकले मादक पदार्थ सेवन गरेको बुझिएको छ ।
त्यस्तै गएराति १० बजे गौरीगंज २ बाहुन टोल बस्ने ६० वर्षीय रबि सोरेनको आफ्नै घरदेखि अन्दाजी ५० मिटर दक्षिणमा रहेको सडकको नालीको पानीमा डुवेर मृत्यु भएको छ । घटनाबारे खबर प्राप्त भएपछि प्रहरी चौकी कोरोबारीबाट प्रहरी टोली खटिएर घटनास्थल सुरक्षित राखेको थियो । इलाका प्रहरी कार्यालय गौरीगंजबाट प्रहरी निरीक्षक कैलाशकुमार अधिकारीको नेतृत्वमा टोली खटिएर सम्पुर्ण कानुनी प्रकृया पुरा गरी शव पोस्टमार्टमको लागि दमक अस्पताल दमक पठाएको छ ।
