झापा / पर्यटक भिसामा नेपाल आएका १० विदेशी नागरिकले नक्कली कागजातको प्रयोग गरी अध्ययन भिसा लिएको तथ्य खुलेको छ। अनुसन्धानका क्रममा उनीहरूले नेपाल संस्कृत विश्वविद्यालय अन्तर्गतको वाल्मीकि विद्यापीठको लेटरहेड किर्ते गरेर तयार पारिएको सिफारिस पत्र पेश गरेको र त्यसैका आधारमा शिक्षा, विज्ञान तथा प्रविधि मन्त्रालयले अध्ययन भिसाका लागि सिफारिस गरेको पाइएको हो।
भिसा लिएका व्यक्तिका गतिविधि शंकास्पद देखिएको भन्दै अध्यागमन विभागले अनुसन्धान गरेपछि मात्रै किर्ते कागजातकै आधारमा विदेशी नागरिकले भिसा लिएको खुलेको हो । प्रदर्शनीमार्गस्थित वाल्मीकि विद्यापीठको लेटर हेड किर्ते गरेर तयार पारिएको नक्कली सिफारिस पत्र दोहोरो परीक्षण नै नगरी शिक्षा तथा खेलकुद मन्त्रालयले ८ चिनियाँ तथा १/१ जना रसियन र कोरियन नागरिकलाई अध्ययन भिसा उपलब्ध गराउन अध्यागमन विभागलाई सिफारिस गरेको थियो ।
विभागका महानिर्देशक रामचन्द्र तिवारीले वाल्मीकि विद्यापीठमा अध्ययन प्रयोजनका लागि भन्दै शिक्षा मन्त्रालयबाट आएको पत्रका आधारमा एक वर्षे अध्ययन भिसा जारी गरेको स्वीकारे । तर यसबारे विभागबाटै थप छानबिन गर्ने क्रममा भिसा लिने व्यक्तिहरू विद्यापीठमा अध्ययनका लागि नआएको खुलेको उनको भनाइ छ ।
सुरक्षा निकाय र सम्बन्धित निकायको अनुसन्धानपछि ती सिफारिस पत्र तथा अन्य कागजात नक्कली रहेको पुष्टि भएको स्रोतले जनाएको छ। प्रारम्भिक अनुसन्धानले पर्यटक भिसामा नेपाल प्रवेश गरेका विदेशी नागरिकहरूले अध्ययनका नाममा भिसा रूपान्तरण गर्न संगठित रूपमा नक्कली कागजात तयार पारेको संकेत गरेको छ।
घटनापछि मन्त्रालयको भिसा सिफारिस प्रक्रिया, कागजात प्रमाणीकरण प्रणाली तथा निगरानी संयन्त्रको प्रभावकारितामाथि प्रश्न उठेको छ। सम्बन्धित निकायहरूले कागजात किर्तेमा संलग्न व्यक्ति वा समूहको खोजी तीव्र बनाएका छन् भने अध्ययन भिसा प्राप्त गरेका विदेशी नागरिकबारे थप छानबिन भइरहेको जनाइएको छ।
यस घटनाले शैक्षिक संस्थाको नाम दुरुपयोग गरेर भिसा प्रक्रियामा हुने अनियमितताको जोखिम उजागर गरेको छ। सरोकारवाला निकायहरूले यस्ता घटनाको पुनरावृत्ति रोक्न कागजात प्रमाणीकरण प्रणालीलाई थप कडाइका साथ लागू गर्नुपर्ने आवश्यकता औँल्याएका छन्।
