झापा । अहिलेसम्म बालविवाह गराउन सहयोग नगरेको र अब पनि बालविवाह नगराउने प्रतिवद्धता जनाएका छन् । झापाका विभिन्न धर्मका धर्मगुरुहरुसंगको एकदिने अभिमुखीककरण कार्यक्रममा उनीहरुले बालविवाह नगराउने प्रतिवद्धता जनाएका हुन् । मागीभन्दा भागी विवाहमा बालविवाह रोक्न चुनौती रहेको उनीहरुले अनुभव सुनाएका थिए ।
धर्मअनुसार विवाह हुने भएकाले बालविवाह न्यूनीकरणमा धर्मगुरुहरुको महत्वपूर्ण भूमिका रहने भन्दै महिला जनचेतना केन्द्र मेचीनगर ६ काँकडभिट्टाले उनीहरुसंग आज बिर्तामोडमा अभिमुखीकरण कार्यक्रम आयोजना गरेको थियो । विभिन्न धर्मका धर्मगुरुहरुले बालविवाह धार्मिक मसला नभएर सामाजिक मसला भएको बताए । उनीहरुले कुनै पनि धर्मको धर्मग्रन्थमा बालविवाह गराउनु भनेर उल्लेख नभएको स्पष्ट पारेका छन् ।
शिवपाञ्चायन नवग्रह मन्दिर मेचीनगर ७ का पण्डित देवराज निरौला, त्यस्तै मधेसी समुदायका पण्डित बाह्रदशीका त्रिलोक झा , बौद्ध धर्मका धर्मगुरु अविदल तामाङ ।
त्यसैगरी मुस्लिम धर्मका धर्मगुरु महमद सहजाद ,इसाई समाज झापाका अध्यक्ष इसहक सेन्चुरी पुसक ताजपुरिया , ज्ञानबहादुर मगर , राधिका आचार्य , श्यामलाल गणेश , टिकालाल राजवंशी , महमद अजाज हुसैन र महमद इहासनुल हक लगायतले बालविवाहका बारेमा आफ्ना अनुभव सुनाएका थिए ।
महिला जनचेतना केन्द्रकी अध्यक्ष सीता गुरुङको अध्यक्षतामा भएको कार्यक्रममा संस्थापक अध्यक्ष राधा प्रधानले स्वागत मन्तव्यसहित कार्यक्रमको औचित्यमाथि प्रकाश पारेकी थिइन् । कार्यक्रमको संचालन संचारकर्मी सुष्मा राजवंशीले गरेकी थिइन् । महिला जनचेतना केन्द्रले सन् २०१९ देखि बालविवाह न्यूनीकरणका लागि काम गर्दै आएको छ । संस्थाले मेचीनगर, बाह्रदशी र कचनकवलमा सो अभियान संचालन गर्दै आएको जनाएको छ ।
