झापा । बिर्तामोड नगरपालिकाको आर्थिक वर्ष २०८०–०८१ मा ११ करोडभन्दा बढी रकम फ्रिज भएको छ । खर्च हुन नसकी ११ करोड ३७ लाख ८६ हजार रुपैयाँ फिर्ता भएको हो ।
पुँजीगत , चालु , वित्तीय र स्थानीय गरी समग्रमा १ अर्ब ३१ करोड ७४ लाख ५१ हजार रुपैयाँ बजेट रहेकोमा १ अर्ब २ करोड ६७ लाख ५६ हजार रुपैयाँ खर्च भएको देखिन्छ । जुन ७७.९३ प्रतिशत हो । खर्च गर्न नसकेको संघ र प्रदेश सरकारको सशर्त , समपूरक र विशेष अनुदान फिर्ता गएको नगरपालिकाका लेखा अधिकृत तेजिन्द्र तामाङले बताए ।
२०८०–०८१ को खर्चलाई हेर्दा पुँजीगततर्फ ६९.४१ प्रतिशत खर्च भएको छ । पुँजीगततर्फ ६६ करोड ४ लाख ४० हजार रुपैयाँमध्ये ४५ करोड ८४ लाख २५ हजार रुपैयाँ खर्च भएको हो । त्यस्तै चालुतर्फ ६४ करोड २१ लाख ९ हजार रुपैयाँमध्ये ५५ करोड ४९ लाख २८ हजार रुपैयाँ खर्च भएको छ । जुन ८६.४२ प्रतिशत हो । त्यस्तै वितीयतर्फ १ करोड ४९ लाख १ हजार रुपैयाँमध्ये १ करोड ३४ लाख १ हजार रुपैयाँ खर्च भएको छ । जुन ८९.९३ प्रतिशत हो ।
बुट्टावारी–प्याकुरेल चोक सडकको ४ करोड ८७ लाख , सुन्दर सामुदायिक भवन अधुवा खोला पक्की पुल डीपीआरसमेतको २ कारेड ५० लाख , मातृ शिशु कार्यक्रमको ७७ लाखलगायतका योजनाको बजेट फ्रिज भएको लेखा अधिकृत तामाङले बताए ।
