झापा / मुस्ताङको लोमन्थाङ स्थित चुङजुङ खोलामा बाढी आएको कारण कालिगण्डकी नदी उर्लिएकाे छ । लोमन्थाङ ४ हुँदै कालीगण्डकीमा मिसिने उक्त खोलामा दिउँसैदेखि बाढी आएको गाउँपालिका अध्यक्ष टसी न्हूर्बू गुरुङले जानकारी दिए ।
बाढी दिउँसैदेखि आएको हो । अहिलेसम्म रोकिएको छैन,’ उनले भने, ‘ताल फुटेर बाढी आएको हुन सक्छ । यता पानी परेको छैन । अरू कारणले बाढी आएको होइन ।’
मुस्ताङ हिमाल पछाडि रहेको छो ल्योङढ्योक ताल फुटेको हुनसक्ने उनको अनुमान छ । खोला किनारमा रहेका नागरिकहरूलाई सुरक्षित हुन उनले आग्रह गरेका छन् । बाढीले केही पुलहरू समेत बगाएको गुरुङले जानकारी दिए ।
‘त्यहाँ रहेका पुलहरू बगाएको भन्ने सूचना आएको छ । क्षतिको विवरण बुझ्दै छौँ,’ उनले भने । ४ वटा काठेपुल र एउटा बेलिब्रिज बगाएको उनले बताए ।
यस्तै, लोमन्थाङको रिङरोड क्षति भएको छ, बाटोहरू धेरै बिग्रिएको छ । अन्य क्षतिबारे भने जानकारी नरहेको उनको भनाई छ ।
