झापा / इटहरीमा आफ्नै श्रीमतीको हत्या गरेको आरोपमा एक जना शिक्षक पक्राउ परेका छन्।
पक्राउ पर्नेमा खोटाङ ऐसेलुखर्क गाउँपालिका-१का सुमन दाहाल रहेकाे प्रहरीले जानकारी दिएकाे छ ।दाहालले आफ्नै २५ वर्षीया श्रीमती अनिशा भट्टराईलाई सोमबार साँझ हत्या गरेको आरोप छ ।
सुनसरी प्रहरी प्रमुख एसपी केशव थेबेका अनुसार अनिशा लोक सेवा आयोगको तयारीका लागि सुनसरीको इटहरी उपमहानगर-१२ मा डेरा बसिरहेकी थिइन्।
उनलाई भेट्न आएका सुमनसित घरेलु विषयमा झगडा परेको थियो। सोही निहुँमा सुमनले अनिशामाथि काठको बटमले टाउकोमा प्रहार गरेका थिए। श्रीमानको आक्रमणबाट गम्भीर घाइते अनिशालाई उपचारका लागि विराटनगर ल्याइएको र उपचार क्रममा उनको ज्यान गएको प्रहरी भनाइ छ।
‘उनी शिक्षक हुन् भन्ने खुलेको छ,’ थेबेले भने, ‘पाँच-छ वर्षको प्रेम सम्बन्धपछि गएको वैशाखमा उनीहरूको बिहे भएको रहेछ।’
