झापा / नेपाल स्काउटका देशभर रहेका सबै तहका परिषद् तथा कार्यकारी समितिहरू विघटन गरिएका छन्।
नेपाल स्काउटका संरक्षक एवं प्रधानमन्त्री बालेन शाहको निर्देशन तथा प्रमुख स्काउट एवं शिक्षा तथा खेलकुदमन्त्री सस्मित पोखरेलको निर्णयअनुसार देशभरका राष्ट्रिय परिषद्, प्रदेश परिषद् र स्थानीय परिषद्का साथै सबै तहका कार्यकारी समितिहरू खारेज गरिएका हुन्।
नेपाल स्काउट राष्ट्रिय प्रधान कार्यालयले एक सूचना जारी गर्दै २०८३ साल श्रावण ५ गतेको निर्णयअनुसार यी सबै समितिहरू विघटन भएको आधिकारिक जानकारी दिएको छ। स्काउटको विद्यमान संरचनालाई नयाँ ढङ्गले अगाडि बढाउन, सांगठनिक बेथिति अन्त्य गर्न र संस्थालाई थप गतिशील एवं सुदृढ बनाउन सरकारले यो कदम चालेको हो। यसै प्रक्रियाअन्तर्गत सरकारले रिक्त रहेको नेतृत्व सम्हाल्न र निर्वाचनको वातावरण बनाउन सन्तोष कुमार थापालाई नेपाल स्काउट अन्तरिम राष्ट्रिय कार्यकारी समितिको प्रमुख आयुक्त पदमा नियुक्त समेत गरिसकेको छ। यो आमूल परिवर्तनसँगै लामो समयदेखि आन्तरिक विवाद र राजनीतिक चलखेलमा फसेको नेपाल स्काउटको संरचनालाई नयाँ ऐन र नियमअनुसार पुनर्गठन गर्ने बाटो खुला भएको छ।
