झापा / ताप्लेजुङमा नेकपा एमाले नेता एवं वडाध्यक्ष टेकेन्द्र सेन्देङ्गमाथि कुटपिट भएको छ ।
आठराई त्रिवेणी गाउँपालिका-२ का वडाध्यक्ष सेन्देङ्गमाथि कुटपिट भएको हो । नेकपा एमाले जिल्ला कमिटी सदस्य समेत रहेको सेन्दाङ्माथि जिल्ला कमिटीको बैठकबाट घर फर्कने क्रममा शनिबार सदरमुकाम नजिकैको तक्मेडाँडामा कुटपिट गरिएको थियो।
७ जना जतिको समूहको आक्रमणबाट घाइते भएका वडाध्यक्ष सेन्देङ्गलाई ताप्लेजुङ अस्पतालबाट रिफर गरेर थप उपचारका लागि बीएण्डसी अस्पताल बिर्तामोड लगिएको हो । सेन्देङ्गसँगै मोटरसाइकलमा सवार जिल्ला कमिटी सदस्य मनकुमार लिम्बु जिल्लामै उपचार गरेर घर फर्किनुभएकाे छ ।
सोही घटनामा संलग्न भएको आरोपमा प्रहरीले केही व्यक्तिहरुलाई पक्राउ गरेपनि नाम खुलाइएको छैन । घटनामा संलग्नहरूको किटानी उजुरी दिने तयारी भइरहेको एमालेले जनाएको छ। कुटपिटमा संलग्नहरुको पहिचान भइनसकेको जिल्ला प्रहरी कार्यालय ताप्लेजुङले जनाएको हो ।
त्यस्तै, ताप्लेजुङका प्रतिनिधि सभा सदस्य समेत रहेका एमालेका सचिव योगेश भट्टराईले घटनामा संलग्नलाई कारबाहीको माग गनुृभएको छ। गृहमन्त्री रमेश लेखकलाई लिखित पत्र लेख्दै उहाँले आइतबार सर्वसाधारण नागरिकको शान्ति सुरक्षाको प्रबन्ध मिलाउन समेत आग्रह गर्नुभयो ।
