झापा / रोल्पाको थबाङ गाउँपालिकाका प्रमुख प्रशासकीय अधिकृतसहित ७ जना कर्मचारी हिडेकाे तीन दिनपछी सम्पर्कमा आएका छन् । बिहीबार बिहान हराएका कर्मचारी गुल्मीबाट सम्पर्कमा आएका हुन्।
गाउँपालिका अध्यक्ष ऋषिकेशव बुढामगरका
अनुसार नेपाल टेलिकमको नेटवर्कमा समस्या आएपछि रुकुम पूर्वमा गएर काम गर्ने
भन्दै कर्मचारीको टोली रोल्पाको थबाङबाट हिँडेको थियो । तर, बुधबार
बेलुकासम्म पटकपटक सम्पर्क गर्दा पनि फोन स्वीच अफ भएपछि कर्मचारी हराएको
सूचना हामीले निकालेका थियाैं ।
सबैतिर हल्लाखल्ला भएपछि बिहीबार बिहान हराएका कर्मचारी टोली सम्पर्कमा आएको थबाङ गाउँपालिका अध्यक्ष बुढामगरले बताए ।उनले भने, "आज बिहान सम्पर्कमा आउनुभयो । उहाँहरु गुल्मीमा हुनुहुँदो रहेछ। किन त्याे ठाँउमा जानुभकाे हाे मलाइ थाहा भएन। आजै जिल्ला सदरमुकाम लिबाङ आएर त्यसपछि थबाङ आउँछौँ भन्नुभएको छ" ।
आर्थिक वर्षको अन्तिममा प्रमुख प्रशासकीय अधिकृत हेमराज घर्तीमगरसहितका कर्मचारीहरू सम्पर्कमा नआएपछि गाउँपालिकाले सूचना नै निकालेको थियो । ‘प्रमुख प्रशासकीय अधिकृत लगायत आर्थिक प्रशासन प्रमुख, सव-इन्जिनियर, प्रशासन शाखा प्रमुख, खा.पा.स.टे. र सवारी चालकहसहित ७ जना मिति २०८२ असार २४ गते बिहान ७ बजेदेखि आजको मिति २०८२ असार २५ गतेसम्म कार्यालयको सम्पर्कमा नआएको,’ सूचनामा भनिएको थियो ।
यसरी आर्थिक वर्षको अन्तिममा प्रमुख प्रशासकीय अधिकृत घर्तीमगरसहितका कर्मचारीहरू सम्पर्कमा नआएपछि थबाङ गाउँपालिका वडा नम्बर २ का पूर्ववडाध्यक्ष समेत रहेका बसन्त रोकामगरले ठेक्कापट्टामा ‘बार्गेनिङ’ नमिलेपछि कर्मचारीको टोली नै सम्पर्कमा नआएको भन्दै उनीहरुविरुद्ध मुद्दा हाल्ने बताए ।
‘क्लोजिङको समय थियो । राति दुई–तीन बजेसम्म पनि बसेर ठेकेदारलाई भुक्तानी दिइएको भन्ने छ । यही अवस्थामा उहाँहरु बार्गेनिङको लागि भाग्नुभयो भन्ने हामीले बुझेका छौं । अब स्थानीय सबै मिलेर मुद्दा हाल्छौं,’ उनले भने ।
गाउँपालिका राष्ट्रिय महासंघले आर्थिक वर्षको अन्तिम दिन कर्मचारीहरु सम्पर्कविहीन हुनुलाई ‘गम्भिर घटना’ भनेको छ ।
आर्थिक वर्षको अन्तिम दिन जनप्रतिनिधि र कर्मचारी मिलेर काम
गर्नुपर्छ तर थबाङमा कर्मचारी
सम्पर्कविहीन हुनु गम्भिर घटना भएकाे र यसबारे सत्य तथ्य पत्ता लगाउने महासंघकी अध्यक्ष लक्ष्मीदेवी पाण्डेले बताइन्।
