झापा / भोजपुरमा भएको कुटपिट घटनामा एक जनाको मृत्यु भएको छ भने प्रहरीले घटनामा संलग्न रहेको आरोपमा ४ जनालाई पक्राउ गरेको छ।
षडानन्द नगरपालिका–१३ रेवामा भएको कुटपिटको घटनामा २४ वर्षीय सम्मरबहादुर तामाङको मृत्यु भएको जिल्ला प्रहरी कार्यालयका प्रहरी नायब उपरीक्षक राजु लामाले जानकारी दिए । जिल्ला प्रहरी कार्यालय भोजपुरका अनुसार सामान्य विवादबाट सुरु भएको झगडा उग्र बन्दै जाँदा कुटपिटमा परिणत भएको थियो।
षडानन्द नगरपालिका–१४ बेखम्चाका २१ वर्षीय सुनील राई, ४४ वर्षीय चन्द्रकुमार राई, २७ वर्षीय सुरज राई र २६ वर्षीय राजेश दर्जीले तामाङलाई मंगलबार राति घरमै पुगेर कुटपिट गर्दा घटनास्थलमै मृत्यु भएको प्रहरीले जनाएको छ ।
उनीहरूलाई नियन्त्रणमा लिएर थप अनुसन्धान अघि बढाइएको जिल्ला प्रहरी कार्यालयले जनाएको छ।
प्रहरीका अनुसार घटनाको वास्तविक कारण र थप संलग्न व्यक्तिहरूको खोजीका लागि अनुसन्धान जारी रहेको छ। दोषीमाथि प्रचलित कानुन अनुसार कडा कारबाही गरिने प्रहरीले बताएको छ।
