झापा । सुनसरीको धरानमा तारिखमा रिहा भएका अपराधी सहितका समूहले सार्वजनिक रुपमा गोरुको हत्या गरी आयोजना गरिएको भोजप्रति विश्व हिन्दु परिषद् झापाको गम्भीर ध्यानाकर्षण भएको छ ।
नेपालमा धार्मिक द्वन्द्व निम्ताएको आपराधिक समूहले घटाएको सो घटना जघन्य आपराधिक गतिविधिको भएको भन्दै परिषद्ले भर्त्सना समेत गरेको छ ।
सो घटनाको विरोधमा परिषद् झापाका अध्यक्ष होमनाथ ढुङ्गेल, उपाध्यक्ष देवेन्द्र ढुङ्गानासहितको पदाधिकारीले शुक्रबार जिल्ला प्रशासन कार्यालय झापा पुगेर ज्ञापनपत्र बुझाएका छन् । झापाका प्रमुख जिल्ला अधिकारी शिवराम पोखरेललाई सो ज्ञापनपत्र बुझाएका हुन् । गाई (गौ वंश) राष्ट्रिय जनावर मात्र नभई बहुसङ्ख्यक सनातनी हिन्दुहरूको आस्था एवं अन्तर आत्मासँग जोडिएको तथ्य उल्लेख गर्दै हिन्दुहरू गौ वंशलाई भगवानको रुपमा पूजने गरेको छ ।
नेपालमा क़ानूनले गौ हत्यालाई पूर्णतः वर्जित गरेको भएपनि आज गौ हत्याको घटना बढ्नु चिन्ताको विषय भन्दै घटनामा संलग्न अपराधीहरूलाई तत्काल गिरफ्तार गरी कडा भन्दा कडा कानुनी कारबाहीको माग सो ज्ञापनपत्रमा उल्लेख गरिएको छ ।
