झापा । बिर्तामोडको पश्चिम स्टेण्डमा रहेको अनिल किराना स्टोरमा म्याद गुज्रिएका अखाद्य वस्तु विक्री वितरण भइरहेको भन्ने गुनासो आएपछि आज अनुगमन गरिएको छ ।
नेपाल सरकार प्रधानमन्त्री तथा मन्त्रिपरिषद्को कार्यालय अन्तर्गत रहेको हेलो सरकारमा उजुरी परेपछि बिर्तामोड नगरपालिकाले अनुगमन गरेको हो । अनुगमनमा २ किलो कुहिएको छोक्डा र नरिवल घाममा सुकाइरहेको फेला परेपछि जफत गरिएको छ ।
अनुगमनमा ३ दिन भित्रमा उपभोक्ताले देखिने गरी मुल्य सूची टाँस्ने, तेल, बेसन लगायतका प्याकेटमा उत्पादन मिति स्पष्ट प्रिन्ट गर्न सम्बन्धित उद्योगहरूलाई निर्देशन दिने, प्याकिङ गर्ने खालका खाद्य वस्तुमा खाद्य अनुज्ञा पत्र लिने लगायतका निर्देशन दिएको नगर उपप्रमुख नगेन्द्र प्रसाद सङ्ग्रौलाले जानकारी दिए ।
हेलो सरकारमा अनिल किराना पसलमा म्याद गुज्रिएका र गुणस्तरहीन वस्तु भण्डारण गरी बिक्री वितरण गर्ने गरेको गुनासो परेको थियो ।
नगर उपप्रमुख सङ्ग्रौलाको संयोजकत्वमा अनुगमन गरिएको हो । अनुगमनमा नगर कार्यपालिका सदस्य यमुना आचार्य, बिर्तामोड उद्योग वाणिज्य संघका कार्यालय सचिव राजु गौतम लगायत विभिन्न सङ्घ संस्थाका प्रतिनिधि र पत्रकारको सहभागिता रहेको थियो ।
