झापा / नेपालमा पाँच वर्षमुनिका बालबालिकामा कुपोषणको समस्या अझै गम्भीर रहेको तथ्य सार्वजनिक भएको छ। स्वास्थ्य तथा जनसंख्या मन्त्रालयअन्तर्गत गरिएको राष्ट्रिय पोषण लेखाजोखा अनुसार देशभरका १८ हजार ३ सय ९ जना बालबालिकामा कडा खालको कुपोषण भेटिएको छ।
परिवार कल्याण महाशाखाका अनुसार देशका ७ सय ७ वटा स्थानीय तहमा गरिएको परीक्षणका क्रममा ठूलो संख्यामा बालबालिका कुपोषित अवस्थामा रहेको पाइएको हो। कुपोषणका कारण बालबालिकाको शारीरिक तथा मानसिक विकासमा प्रत्यक्ष असर पर्ने विज्ञहरूले बताएका छन्।
कलिलै उमेरदेखि कुपोषणको समस्या देखिएका बालबालिकामा रोग प्रतिरोधात्मक क्षमता कमजोर हुने भएकाले उनीहरू विभिन्न संक्रामक तथा दीर्घकालीन रोगको उच्च जोखिममा रहने जनाइएको छ। स्वास्थ्यकर्मीहरूले समयमै पोषणयुक्त आहार, स्तनपानको प्रवर्द्धन र नियमित स्वास्थ्य परीक्षणलाई प्राथमिकता दिनुपर्ने बताएका छन्।
सरकारले कुपोषण न्यूनीकरणका लागि विभिन्न कार्यक्रम सञ्चालन गरिरहेको भए पनि ग्रामीण तथा विपन्न समुदायका बालबालिकामा समस्या अझै चुनौतीपूर्ण रहेको देखिएको छ। विज्ञहरूले बालबालिकाको पोषण अवस्थालाई सुधार्न स्थानीय तह, अभिभावक र सरोकारवाला निकायबीच थप समन्वय आवश्यक रहेको बताएका छन्।
