काठमाडौँ । नेकपा एमाले निकट विद्यार्थी संगठन अनेरास्ववियुले एनसेल बिक्री प्रकरणमा छानबिन गर्न माग गरेको छ । १ खर्ब ४४ अर्बमा खरिद गरिएको कम्पनी ६ अर्बमा बिक्री भएकोमा छानबिन गर्न सरकारसँग माग गरेको हो । अनेरास्ववियु अध्यक्ष समिक बडालले एक विज्ञप्ति जारी गर्दै कम्पनीमाथि छानबिन गरी राज्यलाई हुने क्षति असुलउपर गर्न माग गरेका हुन् ।यस्ता गतिविधि नियन्त्रणमा सरकार गम्भीर नभएर सरकारविरुद्ध तथा यसमा संलग्न जो कोहीविरुद्ध आन्दोलनमा उत्रिने अनेरास्ववियुले चेतावनी दिएको छ ।
पुँजीगत लाभकर लगायत सरकारलाई तिर्नुपर्ने कर छली गर्ने मनसायले विदेशी कम्पनी दर्ता गरी विदेशी लगानी मार्फत शेयर खरिद विक्री हुनु शंकास्पद रहेको अनेरास्ववियुको ठहर छ । विदेशी लगानीको निजी कम्पनीले सरकारमा रहेको दलहरू तथा उच्च पदस्थको सहयोग विना यस प्रकारको छली गर्ने दुस्साहस गर्न नसक्ने उसको ठहर छ । वर्तमान सरकार माफिया र कर्पोरेट मिसनरीहरूको चंगुलमा रहेको भन्दै अनेरास्ववियुले सरकारकै संरक्षणमा यस्ता गतिविधि भइरहेको बताए ।
विदेशी कम्पनीबाट गरिने राज्यविरुद्धका गतिविधिहरूप्रति सजग रहेर भण्डारफोरमा उत्रिने समेत सबैमा अनुरोध गरेको छ ।
