झापा / लागूऔषध खरिद बक्री गर्ने अभियोग लागेपछि नेकपा एमालेले नगर कमिटी सदस्य भानुभक्त खरेललाई निलम्बन गरेको छ भने राष्ट्रिय स्वास्थ्यकर्मी संघले पनि उनलाई निलम्बन गर्दैछ ।
नगर कमिटीको आज सम्पन्न बैठकले खरेललाई अनुसन्धान नसकिएसम्मका लागि निलम्बन गर्ने निर्णय गरेको हो ।त्यसैगरि संघको पदाधिकारीको बैठक बसी केही दिनभित्रै उनलाई निलम्बनको कार्वाही गरिने जिल्ला अध्यक्ष भरत खतिवडाले बताए ।
नगर कमिटी अध्यक्ष सुवास भट्टराईद्वारा जारी विज्ञप्तिमा गलत क्रियाकलापमा संलग्न जो कोहीलाई कारवाही हुनु पर्छ भन्ने मान्यता पार्टीको रहेकाले उनलाई निलम्वन गरिएको उल्लेख गरिएकाे छ ।
खरेल एमालेनिकट राष्ट्रिय स्वास्थ्यकर्मी संघ झापाका उपाध्यक्षसमेत
हुन् । गत फागुन २४ गते भएको अधिवेशनबाट उनी उपाध्यक्ष चुनिएका थिए ।
प्रहरीद्वारा खरेलले सञ्चालन गरेको सनलाइट फर्माको गोदाममा ठूलो परिमाणमा लागूऔषध फेला पारेको थियो । घटनालगत्तै खरेल फरार छन् । उनको मोबाइल स्वीचअफ रहेको छ । खरेलको खोजतलास भइरहेको प्रहरीले जनाएको छ ।
