झापा / आगामी २१ फागुन, २०८२ मा हुने प्रतिनिधि सभाको निर्वाचनमा झापा–५ क्षेत्रले अहिले सबैभन्दा बढी राजनीतिक चर्चा पाएको छ। यो क्षेत्रमा नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीको परम्परागत गढ मानिन्छ, जहाँ उनले विगतमा सातमध्ये छ पटक चुनाव जितेका थिए र एमालेको दाबी अनुसार यहाँको मतदाता आधार मजबुत रहेको छ।
यो क्षेत्र केवल स्थानीय राजनीति, तर राष्ट्रिय स्तरमा पनि नेतृत्वका सवालमा प्रतिष्ठासम्बन्धी प्रतिस्पर्धाको केन्द्र बिन्दु बनेको छ। एमालेका नेताहरूले बालेनको प्रतिद्वन्द्वी उपस्थितिले ओलीका लागि मत संख्यामा ठूलो प्रभाव पार्ने छैन र उनले झापा–५ बाट फेरि पनि ठूलो मतान्तरले विजय हासिल गर्ने दाबी गरेका छन् ।
काठमाडौं महानगरपालिकाका मेयर बालेन्द्र शाह (बालेन) ले झापा–५ बाट प्रतिनिधि सभाको चुनावी दौडमा प्रवेश गर्ने तयारी गरेका छन्। उनी राष्ट्रिय स्वतन्त्र पार्टी (रास्वपा) सँग आबद्ध भएर यो निर्वाचन लड्ने चुनावी तालिका नै सार्वजनिक गरिसकेका छन् । आफ्नो उम्मेदवारी माघ ६ गते दर्ता गर्ने कार्यक्रम समेत तय भएको बताइएको छ।
उक्त तयारीमा बालेनले दमकमा चुनावी र्याली गर्ने समेत योजना बनाएका छन्, जसले यहाँको राजनीतिक माहोललाई झन् तातो बनाएको छ। यद्यपि युवाहरूमाझ “नेतृत्व परिवर्तन” र “नयाँ सोच” को माग बढिरहेको छ, जसले बालेनको उम्मेदवारीलाई आकर्षक विकल्प को रूपमा प्रस्तुत गरेको छ।
बालेनलाई युवा नेतृत्व र नयाँ राजनीतिक ऊर्जाको धुरीका रूपमा हेरिन्छ। उनको काठमाडाैंमा मेयरको रूपमा लोकप्रियता र जनतासँग जोडिएको छविले परम्परागत राजनीतिबाट टाढा रहेका मतदातालाई आकर्षित गर्न सक्छ। युवा मतदातामाझ “नेतृत्व परिवर्तन” र “जनताको आवाज” लगायतका मुद्दाहरू उठिरहेको हुँदा यो चुनाव सिर्फ मतपत्रको लडाइँ मात्र होइन, नेपाली राजनीतिमा नयाँ सोच र परम्परागत शक्तिबीचको प्रतिस्पर्धाको परिक्षण पनि मानिन्छ ।
