झापा । सशस्त्र प्रहरी बल भद्रपुरले स्थानीय सरोकारवाला संस्थाहरूसँग सहकार्य गर्ने प्रतिबद्धता जनाएको छ । लागुऔषधको प्रयोगले स्वास्थ्य, परिवार, समाज र कानुनी पक्षमा पार्ने नकारात्मक असर लगायतका बारे जानकारीलाइ निरन्तरता राख्दै समाज सुधारका लागि डटेर लाग्ने प्रतिबद्धता जनाएकाे हाे ।
सशस्त्र प्रहरी बल नेपालले शनिबार मात्र झापा भद्रपुर २ स्थित विशाल सामुदायिक वन क्षेत्रमा लागुऔषध विरुद्धको जनचेतनामूलक कार्यक्रम सम्पन्न गरेको छ । कार्यक्रममा सशस्त्र प्रहरीको नेतृत्वमा सामुदायिक बाँध निर्माण तथा सरसफाइ कार्यमा श्रमदानसमेत गरिएको थियाे ।
कार्यक्रममा सशस्त्र प्रहरी बल, प्रस्तावित सीमा सुरक्षा गुल्म भद्रपुरका डिएसपी चिरञ्जिवी प्रसाईको नेतृत्वमा ५ जना र बिओपी पृथ्वीनगरबाट प्रहरी निरीक्षक समराज खड्काको नेतृत्वमा थप ५ जनाको संयुक्त टोली सहभागी भएका थिए । टोलीले सामुदायिक स्तरमा फैलिँदो लागुऔषध दुव्र्यसन विरुद्ध सचेतना फैलाउने उद्देश्यले विशेष कार्यक्रम सञ्चालन गरिएको डिएसपी प्रसाईले बताए ।
सशस्त्र प्रहरी बलका प्रतिनिधिहरूले सहभागीहरूलाई लागुऔषधको प्रयोगले स्वास्थ्य, परिवार, समाज र कानुनी पक्षमा पार्ने नकारात्मक असरबारे जानकारी गराएका थिए । कार्यक्रममा विद्यालयस्तरदेखि नै शिक्षामार्फत सचेतना फैलाउनु जरुरी रहेको र समुदायले सुरक्षा निकायसँग सहकार्य गरी लागुऔषध तस्करी नियन्त्रण गर्नुपर्नेमा जोड दिएका थिए ।
कार्यक्रममा विशाल सामुदायिक वन उपभोक्ता समूहका अध्यक्ष सञ्चाहाङ लिम्बुको संयोजनमा करिब डेढसय जना स्थानीयवासीहरू सहभागी थिए ।
सशस्त्र प्रहरीको टोलीले जनचेतनामूलक सन्देश बाहेक बाँध निर्माण कार्यमा समेत प्रत्यक्ष श्रमदान गर्दै समुदायसँग काँधमा काँध मिलाउँदै आइरहेको उनले जनाए ।
