झापा / नेकपा (एमाले) ले आज ७५३ वटै पालिकामा जनसभा तथा प्रदर्शन गरिरहेकाे छ।
संविधानको रक्षा र प्रतिनिधि सभा पुनर्स्थापानाका लागि भन्दै जनपरिचालनलाई तीव्रता दिएको एमालेले आज पालिका तहमा प्रदर्शन केन्द्रित गरेको हो। प्रदर्शन बिहान ७ बजेदेखि नै सुरू भएको र यो क्रम साँझ पाँच बजेसम्म रहने एमालेले जानकारी दिएको छ।
पालिका तहको प्रदर्शनका लागि एमाले महासचिव शंकर पोखरेलले पाँच बुँदे निर्देशन दिएका थिए। त्यहीअनुसार आज बिहानैदेखि पालिका तहमा प्रदर्शन, भेला र अन्तरक्रिया भइरहेको एमालेले जानकारी दिएको छ।
एमालेले कात्तिक २२ गते वडा तहमा जनप्रदर्शन गरेको थियो। अब जिल्ला तहमा कात्तिक २९ गते हुनेछ। काठमाडौंमा मंसिर ६ गते व्यापक जनप्रदर्शन गर्ने एमालेले बताएको छ।
ठूलो जनसभा चाहिँ एमालेले आगामी मंसिर २७ गते काठमाडौंमा गर्ने तयारी गरेको छ। त्यस दिन एमालेले ११ औं महाधिवेशनको उद्घाटन पनि गर्दैछ।
