झापा । झापा गाउँपालिकामा रहेको डिल्लीराज माध्यमिक विद्यालयमा शिक्षकहरुले तालाबन्दी गरेका छन् ।
प्रधानाध्यापक बिरेन्द्रप्रसाद गुप्ताको कोठा र जिन्सी शाखामा तालाबन्दी गरिएको शिक्षक प्रतिनिधि एकनारायण गणेशले जानकारी दिए ।
शिक्षकहरुले विद्यालयमा बढ्दो बेथिती अन्त्य गर्न माग गर्दै आएका छन् ।
उनीहरुले विद्यालयका प्रअ गुप्ताबिरुद्ध अख्तियारमा परेको मुद्दाको तत्काल
छिनोफानो हुनुपर्ने माग राखेका छन् । सर्वपक्षीय र अभिभावक भेलाको माग
गर्दै शिक्षकले तालाबन्दी गरेका हुन् । विद्यालयको पठनपाठनमा भने कुनै
अवरोध नभएको बुझिएको छ । तालाबन्दीका क्रममा विद्यालय व्यवस्थापन समिति
अध्यक्ष कलाम शेखको उपस्थिति रहेको थियो ।
यसैबीच झापा गाउँपालिकाका कार्यवाहक अध्यक्ष अन्जुदेवी थपलियाको रोहवरमा ताला खोलिएको छ । बुधवार गाउँपालिका कार्यालयमा छलफल गर्ने गरी ताला खोलिएको जनाइएको छ । पुष १७ गते विद्यालयका संस्थापक स्व. डिल्लीराज गणेशको ३४ औं स्मृति दिवस र विद्यालयको ६० औं वार्षिकोत्सव आयोजना नगर्दा शिक्षकहरुले तालाबन्दी गरेको प्रअ गुप्ताले दावी गरे । उनले स्मृति दिवस तथा विद्यालयको वार्षिकोत्सब विद्यार्थीहरुको वार्षिक नतिजा आएपछि मनाउने विद्यालय व्यवस्थापन समितिको निर्णय रहेको जानकारी दिए ।
