झापा । झापाको भद्रपुरमा जारी ओम साई पाथिभरा हस्पिटल प्रथम अन्तर पालिका जिल्लास्तरीय लिग तथा नकआउट फुटबल प्रतियोगिताको आफ्नो दोस्रो खेलमा भद्रपुर र कचनकवलले बराबरी खेलेसँगै नतिजा रोमाञ्चक बनेको छ ।
कचनकवलले अन्तिम खेल ६ अंक रहेको शीर्ष स्थानको मेचीनगरसँग खेल्नेछ भने १ अंक मात्र रहेको भद्रपुरले १ अंक रहेको अन्तिम स्थानको बाह्रदशीको सामना गर्नेछ । बाह्रदशी गोलअन्तरले भद्रपुरभन्दा एक स्थान तल रहेको छ ।
आजको पहिलो खेलको सुरुवाती अग्रता भद्रपुरले लिए पनि थामिन नसक्दा कचनकवलले गोल फर्कायो । खेलको १७ औँ मिनेटमा भद्रपुरका निवाङ लिम्बूले गरे पनि ६९ औँ मिनेटमा कचनकवलका सुगम राईले गोल गर्दै बराबरी बनाए ।
खेलको प्लेयर अफ दि म्याच कचनकवलका कप्तान रामबाबु शाह भए । उनलाई गोल्डकपका अध्यक्ष दिपेश ढकाल, महासचिव जीवनकुमार श्रेष्ठ, भद्रपुर जेसीजका पूर्वअध्यक्ष प्रकाश भण्डारीले नगद दुई हजार र ट्रफी प्रदान गरे ।
यसैबीच, आज भएको दोस्रो अर्जुनधारा विजयी बन्यो । अर्जुनधाराले कमल गाउँपालिकालाई हराएसँगै समूह घ को नतिजा पनि रोमाञ्चक बनेको छ ।
खेलको अन्तिम पाँच मिनेटअघि कमलका खेलाडीले मुख्य रेफ्री डिकबहादुर श्रेष्ठलाई हातपात तथा कुटपिट गरेका थिए । कुटपिटबाट श्रेष्ठ घाइते बनेका छन् ।
कमलका कप्तान लक्ष्मण बेघा, गोलकिप्पर उत्तम कार्की र प्रशिक्षक चित्रमान राईले रेफ्री श्रेष्ठलाई हातपात गरेपछि रातो कार्ड खाएका थिए ।
कार्ड पाएपछि कमलले खेल नखेल्ने भन्दै मैदान छोडेपछि अर्जुनधारालाई विजयी घोषणा गरिएको थियो । आयोजक र अफिसियलहरुले मैदान नछोड्न आग्रह गरे पनि कमलले मानेन ।
आजको जितसँगै अर्जुनधारा आफ्नो समूहको पहिलो स्थानमा चढेको छ । उसको ४ अंक पुगेको छ ।
यसअघि खेलको २८ औँ मिनेटमा अर्जुनधारका निखिल तामाङले गोल गरेका थिए । तर, ३८ औँ मिनेटमा कमलका नरबहादुर मगरले गोल फर्काएका थिए ।
अर्जुनधाराले अन्तिम खेल अंकविहीन रहेको दमकसँग प्रतिस्पर्धा गर्नेछ भने एक खेल खेल्न बाँकी रहेको कमललाई प्रगियोगिताबाटै निलम्बन गरिएको छ । खेल नियमविरुद्ध रेफ्रीमाथि कुटपिट गरेको कारण कमललाई बाँकी खेलमा प्रतिबन्ध लगाइएको हो ।
फुटबलको उर्वर भूमि झापाबाट युवा खेलाडी उत्पादन गर्ने उद्देश्यले आयोजना भएको प्रतियोगितमा झापाका १४ वटा पालिका र आयोजकको भद्रपुर ब्लेजर्स टिम गरी प्रतियोगितामा १५ वटा टिमले प्रतिस्पर्धा गर्दै छन् ।
१८ दिनसम्म सञ्चालन हुने प्रतियोगिताको फाइनल खेल मंसिर २४ गते हुने महासचिव जीवनकुमार श्रेष्ठले जानकारी दिए ।
खेल तालिकाअनुसार समूह ‘क’ मा हल्दिबारी, बिर्तामोड र बुद्धशान्ति रहेका छन् । समूह ‘ख’ मा कनकाई, भद्रपुर ब्लेजर्स, झापा र गौरादह, समूह ‘ग’ मा कचनकवल, बाह्रदशी, मेचीनगर र भद्रपुर तथा समूह ‘घ’ मा कमल, दमक, शिवसताक्षी र अर्जुनधारा रहेका छन् ।
प्रत्येक समूहका विजेता र उपविजेता आठवटा टिम नकआउट चरणमा प्रवेश गर्ने छन् । नकआउट चरणका खेलहरु क्वार्टर फाइनलबाट सुरु हुनेछन् । क्वार्टर फाइनलका खेल मंसिर १९ र २० गते हुने छन् । सेमिफाइनलका खेल मंसिर २२ गते हुने छन् ।
प्रतियोगिताको विजेताले नगद ३ लाख, ट्रफी, मेडल र प्रमाणपत्र पाउनेछ भने उपविजेताले नगद २ लाख, ट्रफी, मेडल र प्रमाणपत्र प्राप्त गर्नेछ ।
प्रत्येक खेलको प्लेयर अफ द म्याचले नगद २ हजार रुपैयाँ पाउने छन् । त्यस्तै, उत्कृष्ट गोल किप्पर, उत्कृष्ट प्रशिक्षक, उच्च गोलकर्ता र उदीयमान खेलाडीले नगद ५ हजार रुपैयाँ, ट्रफी र मेडल प्राप्त गर्ने छन् । प्रतियोगिता सम्पन्न गर्न ८० लाख रुपैयाँ खर्चको अनुमान गरिएको छ ।
