रोल्पामा वर्षाका बेला रेनकोट ओढेर विद्यालय जाँदै गरेको भिडियो सामाजिक सञ्जालमा भाइरल बनेपछि तीन बालिकाको शिक्षाको जिम्मेवारी स्थानीय तह र विद्यालयले लिएका छन् ।
रुन्टीगढी–४ टोलबाङकी सियाँ घर्ती तथा मनजीता पुन र मनजीता घर्तीलाई हाल अध्ययनरत एडभान्स चाइल्ड केयर इङ्लिस बोर्डिङ स्कुलले कक्षा ६ सम्म निःशुल्क पढाउने भएको छ। त्यस्तै, कक्षा ७ देखि स्नातक तहसम्मको सम्पूर्ण अध्ययन खर्च रुन्टीगढी गाउँपालिकाले व्यहोर्ने प्रतिबद्धता जनाएको छ ।
शुक्रबार गाउँपालिका अध्यक्ष जनक पुन, विद्यालयका प्रिन्सिपल तेजबहादुर पुन र समाजसेवी तथा पत्रकार भुवन थापालगायतको टोलीले बालिकाका अभिभावकसँग भेट गरी निःशुल्क शिक्षासम्बन्धी सहमति गरेको हो ।
वर्षामा रेनकोट लगाएर उकालो बाटो हुँदै विद्यालय जाँदै गरेका तीन बालिकाको भिडियो केही दिनयता सामाजिक सञ्जालमा व्यापक रूपमा चर्चित बनेको थियो ।
