झापा । मेची प्रादेशिक अस्पताल भद्रपुरको प्रशासनिक भवनभित्र एक कर्मचारी मृत भेटिएका छन् । भद्रपुर नगरपालिका–१० कलबलगुडीका अन्दाजी २४ वर्षीय सुरज शर्मा झुन्डिएको अवस्थामा बुधबार बिहान ८ः५० बजे मृत फेला परेको जिल्ला प्रहरी कार्यालय झापाले जनाएको छ ।अस्पतालको स्वास्थ्य बीमा दाबी गर्ने शाखामा करारमा कार्यरत हेल्थ असिस्टेन्ट शर्मा प्रशासनिक भवनको तेस्रो तल्लाको बीमा कोठाभित्रै नाइलनको डोरीले झुन्डिएको अवस्थामा फेला परेको जिल्लाका डिएसपी कृष्णकुमार चन्दले जानकारी दिए । सीसी टिभी फुटेज हेर्दा शर्मा गएराती करिब १० बजे सो कोठाभित्र एक्लै प्रवेश गरेको देखिएकाे प्रहरीकाे भनाइ छ । बुधबार बिहान सरसफाई कर्मचारीले कोठाभित्र शव देखेपछि हो-हल्ला गरेका थिए ।
त्यसपछि वडा प्रहरी कार्यालय भद्रपुर र जिल्ला प्रहरी कार्यालय झापाको
टोली घटनास्थल पुगेर शवको कानुनी प्रक्रिया गरी पोस्टमार्टमका लागि पठाएको
प्रहरीले जनाएकाे छ । आत्महत्या गर्नु पर्ने कारण भने खुलिनसकेकाे जनाइएकाे छ ।
