लागूऔषधको कारोबार गर्ने एकजना कारोबारी झापाको अर्जुनधारामा पक्राउ परेका छन् । आज दिउँसो ३ बजे अर्जुनधारा वडा न.८ सब्जीलाइनमा लागूऔषध ओसारपसार गरिरहेको भन्ने गोप्य सूचनाको आधारमा लागूऔषध ब्युरो काँकडभिट्टा र प्रहरी चौकी शनिश्चरेबाट खटिएको संयुक्त टोलीले अर्जुनधारा ८ बस्ने बर्ष ४१ का सरोज गहतराजलाई पक्राउ गरेको हो ।
बिर्तामोडवाट शनिश्चरेतर्फ जाँदै गरेको बा ५७ प ७७३३ न.को मोटरसाइकललाई शंका लागेर चेकजाँच गर्दा मोटरसाइकल चालक गहतराजको साथबाट एन१० लेखिएको खोल बिनाको सेतो ट्याब्लेट ३० थान, प्लास्टिकसहित ३३ ग्राम १०० मिलिग्राम र प्लास्टिकबाहेक २३ ग्राम ५५० मिलिग्राम ब्राउन सुगर ,मोबाइल–२ थान फेला परेको थियो । लागूऔषधसहित मोटरसाइकल र गहतराजलाई नियन्त्रणमा लिई थप अनुसन्धान भइरहेको जिल्ला प्रहरी कार्यालयले जनाएको छ ।
