मेडिकल व्यवसायी दुर्गा प्रसाईँको समर्थन गर्दै एमाले नेता महेश बस्नेत सहभागी कार्यक्रममा उनीहरूले सवारी तोडफोड गरेको प्रहरीको आरोप छ । तोडफोडमा सम्लग्न भएको भन्दै प्रहरीले विक्रम लिम्बूलाई गत विहीवार नै पक्राउ गरेको थियो भने अर्का आरोपी विजय चौधरीलाई मङ्गलवार पक्राउ गरी जिल्ला अदालत झापाबाट म्याद थप गर्दै अनुसन्धान शुरु गरिएको इलाका प्रहरी कार्यालय अनारमनीका प्रहरी नायव उपरीक्षक सुरज कार्कीले जानकारी दिए । पक्राउ पर्ने दुवै प्रसाईँका समर्थक रहेको बताइएको छ ।
पक्राउ परेका मध्ये चौधरीले बिर्तामोडमा आफैँ पेट्रोल छर्केर आफ्नै शरीरमा आगो लगाउने प्रयास गरेका थिए । १३ वटा चार चक्के र ८ वटा दुई चक्के सवारीसाधनमा क्षति पुगेकाले क्षतिपूर्तिको मागसहित दोषीलाई मुलुकी अपराध संहिता २०७४ को दफा २८५ बमोजिम कारबाही गर्नुपर्ने पीडितहरूले उजुरी दिएपछि लिम्बु र चौधरीलाई पक्राउ गरिएको प्रहरीले जनाएको छ ।
उनीहरूलाई मुलुकी अपराध संहिता २०७४को परिच्छेद–२६ मा रहेको आपराधिक प्रवेश तथा आपराधिक उपद्रव सम्बन्धी कसुर अन्तरगत मुद्दा चलाएको जनाएको छ । उपद्रव कसुरमा कसैले कसैको सम्पत्तिमा आपराधिक प्रवेश गर्न वा गराउन हुँदैन ।
(२) उपदफा (१) को प्रयोजनको लागि कसैले देहायको कुनै काम गर्ने नियतले हूल हुज्जत गरी वा नगरी अनिधाकृत रुपमा अर्काको स्वामित्व वा कब्जामा रहेको कुनै सम्पत्तिमा त्यस्तो व्यक्तिको अनुमति नलिई प्रवेश गरेमा वा अनुमति लिई प्रवेश गरेकोमा त्यस्तो कुनै काम गर्ने नियतले सो सम्पत्तिमा बसिरहेमा, ओगटेमा वा सम्पत्ति उपभोग गरी रहेमा निजले आपराधिक प्रवेश गरेको मानिने कानुनी व्यवस्था रहेको प्रहरीले जनाएको छ ।
