झापा । झापाका प्रमुख जिल्ला अधिकारी गोपालकुमार अधिकारीले निर्माणाधीन ‘एसियन हाइवे’को काम चुस्त बनाउन काँकरभिट्टा लौकही सडक आयोजना (पूर्वी) खण्डलाई निर्देशन दिएका छन् । आयोजना प्रमुख सुनिलबाबु पन्तलाई निर्माणाधीन सडकको डाइर्भसन बनाइएको ठाउँमा पानीको निकासलाई व्यवस्थित गर्न निर्देशन दिएका हुन् ।
ठूलो पानी आएको समयमा पानीले निकास नपाएर राजमार्ग नै अवरुद्ध पार्न सक्ने कुरालाई मध्यनजर गर्दै अहिले नै व्यवस्थित गर्न प्रमुख जिल्ला अधिकारीले पन्तलाई निर्देशन दिए ।यस अघि परेको पानीले निकास नपाउँदा सडक अवरुद्ध भएको भन्दै प्रमुख जिल्ला अधिकारीले डाइभर्सनका कारण सडक अवरुद्ध हुन नदिन समयमा नै डाभइभर्सन र पानीको निकासलाई व्यवस्थित गर्न निर्देशन दिए ।
निर्माणाधीन पूर्व – पश्चिम सडकको पूर्बी खण्डको अवलोकन गर्दै प्रमुख जिल्ला अधिकारीले सडक पूर्वाधार आयोजना प्रमुख सहित निर्माण व्यवसायीसंग छलफल समेत गरेका छन् ।
सडक निर्माणाधीन अवस्थामा रहेकाले सवारीलाई तीब्र गतिमा नकुदाउन उनले सवै सवारी चालकलाई अनुरोध गरेका छन् । यदि तीव्र गतिमा सवारी चलाइएको खण्डमा ट्राफिक प्रहरीले तत्कालै जरिवाना गर्ने प्रजिअ अधिकारीको भनाई छ ।
सडक दुर्घटना न्यूनीकरणका लागि ट्राफिक प्रहरी मात्र नभई यातायात व्यवसायी र सवारी चालक समेत गम्भीर बन्नु पर्ने प्रजिअ अधिकारीको भनाई छ ।
एसियाली राजमार्ग नम्बर २ अन्तर्गत काँकडभिट्टाबाट लौकहीसम्मको एक सय २० किलोमिटर सडक स्तरोन्नति हुने भनिए पनि हाल ९५ दशमलव ७६ किमीमा मात्र काम भइरहेको छ ।
