झापा । झापामा प्रतिबन्धित लागूऔषध ब्राउनसुगरसहित पाँच जना पक्राउ परेका छन् ।
पक्राउ पर्नेहरु कमल गाउँपालिका ५ का तीनजना र बिर्तामोड ३ का दुईजना रहेका छन् । आज दिउँसो ३ बजेको समयमा मेचीनगर नगरपालिका ६ पुरानो मेची पुलमा लागूऔषध नियन्त्रण व्युरो काँकरभिट्टा र ईलाका प्रहरी कार्यालय काँकरभिट्टाबाट खटिएको संयुक्त प्रहरी टोलीले नेपालतर्फ पैदल आउँदै गरेका कमल ५ नमुना टोल बस्ने अन्दाजी १९ वर्षीय प्रितेश राई, सोही ठाउँ बस्ने अन्दाजी २७ वर्षीय यामप्रसाद सुनुवार, अन्दाजी २१ वर्षीय आमोद राईलाई शंका लागेर चेकजाँच गर्नेक्रममा प्रितेश राईलाई मुख खोल्न लगाउँदा उनको मुखभित्र सेतो रङको प्लाष्टिकको पोकामा लुकाईछिपाई ल्याउँदै गरेको ४ ग्राम ४० मिलिग्राम ब्राउनसुगर भेटिएको थियो । तीनै जनालाई नियन्त्रणमा लिई ईप्रका काँकरभिट्टामा राखिएको जिल्ला प्रहरी कार्यालयले जनाएको छ ।
त्यस्तै बिर्तामोडबाट लागूऔषध ब्राउनसुगरसहित दुई जना पक्राउ परेका छन् । पक्राउ पर्नेहरूमा बिर्तामोड नगरपालिका– ३ का २२ वर्षीय कृष्णकुमार थापा र २३ वर्षीय अजय राजवंशी रहेको जिल्ला प्रहरी कार्यालय झापाले जनाएको छ । उनीहरूलाई गोप्य सूचनाको आधारमा प्रहरी चौकी बिर्ताबजारबाट खटिएको प्रहरी टोलीले १ ग्राम १७० मिलिग्राम ब्राउनसुगरसहित पक्राउ गरेको हो । पक्राउ परेका उनीहरूमाथि थप अनुसन्धान भइरहेको प्रहरीले जनाएको छ ।
