साङ्केतिक तस्वीर
झापा । करेन्ट लगाएर माछा मार्दा झापाको कमलमा एक युवकको मृत्यु भएको छ ।
मृत्यु हुनेमा कमल गाउँपालिका –३ खानपानी टोल बस्ने २१ वर्षीय उज्वल राई रहेकाे जिल्ला प्रहरी कार्यालय झापाले जनाएकाे छ । प्रहरीले दिएकाे जानकारी अनुसार बुधबार दिउँसो अन्दाजी २ बजे कमल गाउँपालिका –३ मा रहेको ढ्याङ्ग्री खोलामा करेन्ट लगाई माछा मार्न गएका थिए । माछा मार्ने क्रममा राई आफैलाई करेन्ट लागेको थियो ।
घाइते भई उनी लडिरहेको अवस्थामा आफन्तले देखेर उपचारको लागि लाइफलाइन अस्पताल दमकमा पुर्याउनासाथ डाक्टरले मृत घोषणा गरेका थिए ।
मृतकको शव दमक अस्पताल दमकको शवगृहमा राखिएको र घटनाबारे थप अनुसन्धान भइरहेको जिल्ला प्रहरी कार्यालयले जनाएको छ ।
