झापा । केही हप्ता अघि बिर्तामोडस्थित औषधि व्यवसायी भानुभक्त खरेलको गोदामबाट प्रहरीले ठूलो परिमाणको लागूऔषध बरामद गरेको थियो । बरामद गरिएको औषधिसहित त्यहाँ कार्यरत कर्मचारीलाई प्रहरीले पत्रकार सम्मेलनको आयोजना गर्दै सार्वजनिक गरेपनि प्रहरीले औषधि व्यवसायीको नाम समेत सार्वजनिक गरेको छैन । उनी हाल फरार छन् । उनको खोजी भइरहेको जनाए पनि प्रहरीले हालसम्म खरेललाई पक्राउ भने गरेको छैन ।
इलाका प्रहरी कार्यालय अनारमनीले बिर्तामोड–५ मंगलदीप टोलस्थित मनकुमार संग्रौलाको दुई तले घरको भुइँतलाको दुईवटा कोठामा भण्डारण गरेर राखेको औषधिजन्य प्रतिबन्धित लागूऔषध बरामद गरेको थियो ।
ट्रामाडोल हाइड्रोक्लोराइड एक लाख तीन हजार आठसय, ट्रामाडोल हाइड्रोक्लोराइड इन्जेक्सन ट्रामाडेक्स एक हजार ८ सय ७० एम्पुल, ट्रामाडोल र एसिटामिनोफेन ट्याब्लेट चार हजार ५०, डाइसाइक्लोमाइन एचसीएल ट्याब्लेट २० मिलीग्राम ९७ हजार ट्याब्लेट, सिल्डेनाफिल ट्याब्लेट १०० मिलीग्राम (जेनेग्रा एमटी रेड १००) आठ हजार ९ सय ट्याब्लेट, मिफेप्रिस्टोन ट्याब्लेटको कम्बिप्याक आई र मिसोप्रोस्पोल ट्याब्लेट (टर्मिपिल किटहरू) ७ वटा बरामद गरेको थियो ।
प्रहरीले लागूऔषधसहित खरेलले सञ्चालन गरेको सनलाइट फर्मामा कार्यरत कर्मचारी अर्जुनधारा–६ दासपुल निवासी २५ वर्षीय बिनोद घिमिरेलाई समेत पक्राउ गरेको थियो । प्रहरीले घिमिरेले प्रयोग गर्दै आएको १–०१–०१३ प ८९०४ नम्वरको मोटरसाइकल समेत बरामद गरेको थियो ।
झापाको बिर्तामोड र दमकबाट एकपछि अर्काे लागू औषध कारोवारमा सम्लग्न कारोवारी पक्राउ गरेसंगै उनीहरुको धन्दा सार्वजनिक भएको हो । औषधि व्यवसायको आडमा उनीहरुले गर्ने गरेको अबैध कारोवार सार्वजनिक भएको छ ।
इलाका प्रहरी कार्यालय अनारमनीको प्रहरीको टोलीले बिर्तामोड नगरपालिका–२ चैतुबारीस्थित दिवाकर फर्माका सञ्चालक किरण राजवंशीलाई लागू औषध क्याप्सुलसहित पक्राउ गरेको छ ।
प्रहरीका अनुसार बिर्तामोड–२ निवासी ३८ वर्षीय राजवंशीले सञ्चालन गरेको पसलबाट विशेष सूचनाको आधार प्रहरीले शनिवारसाँझ ५ बजे ट्रामाडोल ३०० पत्ता (३००० क्याप्सुल) र प्रिजेक्स–७५ लेखिएको ३० पत्ता (३०० क्याप्सुल) बरामद गरेको थियो ।
सो पसलमा लागूऔषध बिक्री वितरण भइरहेको विशेष सूचनाको आधारमा लागूऔषध
नियन्त्रण ब्युरो काँकडभिट्टा र इलाका प्रहरी कार्यालय अनारमनीबाट खटिएको
संयुक्त टोलीले छापा मारेको थियो ।
यता पक्राउ परेका राजवंशीलाई इलाका प्रहरी कार्यालय अनारमनीमा राखेर थप अनुसन्धान भइरहेको प्रहरीले जनाएको छ ।
