अर्काको घरबाट राँगा र बोका चोरी गरेर खुदुनाबारीमा बेच्न लाग्दा दुईजना पक्राउ परेका छन् ।
पक्राउ पर्नेहरुमा अर्जुनधारा वडा नं.७ बस्ने २२ वर्षीय सेवन्त चौधरी र सोही ठाउँ बस्ने २० वर्षीय राजकुमार चौधरी रहेका छन् ।
हिजो बिहानको राति कन्काई वडा नं.८ बस्ने ५७ वर्षीया लक्ष्मीमाया लिम्बूको गोठमा बाँधेको एउटा राँगा चोरी भएको थियो । त्यसबारे इलाका प्रहरी कार्यालय बिर्तामोडमा मौखिक जानकारी हुनसाथ इप्रका बिर्तामोडबाट प्रहरी टोली खटिनुको साथै मातहत समेतबाट टोली परिचालन भई खोजतलास शुरु गरिएको थियो ।
त्यसक्रममा हिजो मध्यान्ह अर्जुनधारा वडा नं.१ खुदुनाबारीस्थित साप्ताहिक पशुबजारमा हराएको राँगा बेचबिखनका लागि बाँधेको अबस्थामा फेला परेको थियो । राँगा समातिरहेका चौधरीद्वयलाई शङ्कास्पद लागेर अस्थायी प्रहरी चौकी खुदुनाबारीमा राखेर सोधपुछ तथा अनुसन्धान गर्दा उनीहरुले सो राँगा चोरी गरी ल्याएको बताएका थिए ।
प्रारम्भिक अनुसन्धानको क्रममा असार ७ गते अर्जुनधारा वडा नं.७ बस्ने विवेक तामाङको घरबाट समेत बोका चोरी गरी ल्याई बिक्री गरेको उनीहरुले बताएका थिए । चोरी भएको बोका खरिद गर्ने सोही ठाउँ बस्ने धनबहादुर थकालको घरबाट सो बोका बरामद भएको छ ।
दुवै चौपाया सम्बन्धित धनीलाई बुझाई चोरीको दुवै घटनामा संलग्न उनीहरुलाई पक्राउ गरी अदालतबाट पाँच दिनको म्याद थप गरी आवश्यक अनुसन्धान भइरहेको प्रहरीले जनाएको छ ।
