झापा । गत असोज १८ गते राष्ट्रिय रमणीय आदर्श माध्यमिक विद्यालय दुधेका प्रधानाध्यापक लालमणि सुवेदीमाथि हातपात गर्ने पूर्व शिक्षक गणेशप्रसाद भण्डारीले सार्वजनिक माफी मागेका छन् ।
उनले लिखित र मौखिक दुवै प्रकारले माफी मागेका हुन् । विद्यालयका प्रधानाध्यापक सुवेदीले आफूले भौतिक आक्रमण सहेर पनि उदार दिलका साथ माफी मिनाहा दिएकाले शीर निहुराइ माफी मागेको भण्डारीले लिखित क्षमायाचनामा जनाएका छन् । । आगामी दिनहरुमा यस प्रकारका अमर्यादित गतिविधि नदोहोर्याउने उनले प्रतिवद्धतासमेत जनाएका छन् ।
भण्डारी सो विद्यालयमा अस्थायी शिक्षकको रुपमा २०५१ साल फागुन १७ गते प्रवेश गरी २०६१ सालमा स्थायी भएका थिए । १९बर्ष ४ महिना २० दिन स्थायी सेवा पुरा गरी उनी २०८० असोज ३ गते ६० वर्ष भइ अनिवार्य अवकाश भएका थिए । भण्डारीको अस्थायी अवधिको संंचित विदा ११५ दिन र स्थायी सेवा अवधिको संचित विदा ११० भएकोमा उनले सेवा अवधिको संचित विदा ६५ दिन स्थायी सेवा अवधिकै विदा ११० दिनमा थप गरी कुल विदा १७५ दिन प्रमाणित गरिदिन प्रधानाध्यापक सुवेदीसंग माग गरेका थिए ।
आफ्नो पदीय जिम्मेवारी र प्रचलित ऐन नियमविपरित हुनेगरी सिफारिस नदिने बताएपछि भण्डारीले सुवेदीमाथि हातपात गरेका थिए ।
