झापा । भारतबाट भन्सार छलेर काँकडभिट्टा नाका हुदै नेपाल भित्रिएका तीनवटा भारतीय कन्टेनरसहित साढे ३ कराेडभन्दा माथिकाे सामान प्रहरीले नियन्त्रणमा लिएकाे छ ।
जिल्ला प्रहरी कार्यालय झापाले दिएकाे जानकारी अनुसार गाेप्य सूचनाका आधारमा आइतबार साँझ ७ बजे जिल्ला प्रहरी कार्यालयबाट खटिएकाे प्रहरी टाेलीले बिर्तामाेड ५ स्थित पूर्व-पश्चिम राजमार्गमा चेक जाँचका क्रममा एनएल०१ एएच ५६७९, एनएल ०१ एन ९२२३ र एनएल ०२ एल ७४८६ नम्बरका कन्टेनरमा भन्सार छलि गरेका कृषि औजार बरामद गरिएकाे जिल्लाका निमित्त सूचना अधिकारी एवम इन्सपेक्टर प्रविण श्रेष्ठले देश प्रदेश खबरलाई जानकारी दिए ।
सामानकाे अन्दाजी ३ कराेड ६१ लाख मूल्य कायम गरी आवश्यक कारबाहीका लागि राजस्व अनुसन्धान कार्यालय इटहरी पठाइएकाे उनले जानकारी दिए ।
काँकडभिट्टाबाट बिर्तामाेडसम्म यसरी कन्टेनर आउनुमा भन्सार नाकामा खटिएका दुवैतर्फका सुरक्षाकर्मी, इलाका तथा चाैकीका इन्चार्ज ,भन्सार कर्मचारीमाथि अनुसन्धान हुन जरूरी देखिन्छ ।
