झापा । केरा बगानभित्र मृत भेटिएका दुई नाबालिकाकी आमालाई झापामा पक्राउ गरिएकाे छ । मोरङको सुन्दरहरैँचा नगरपालिका–७ स्थित गत शनिबार केरा बगानभित्र दिदी–बहिनीको शव फेला परेको
थियो । धनकुटाको पाख्रीबास नगरपालिका–४ डिकुरे घर भइ सुन्दरहरैँचा–७ मा
बस्दै आएका अर्जुन कार्कीका नाबालिका छोरीहरू १ वर्षीया आइका र ३ वर्षीया
अर्पणा कार्की शनिबार दिउँसो ४ः३० बजेतिर मृत फेला परेका थिए ।
सो घटनामा मृतक नाबालिकाकी आमा अस्मिता न्यौपाने फरार भएकी थिइन् । २९
वर्षीया अस्मितालाई प्रहरीले शनिबार साँझदेखि नै खोजी तीव्र पारेको थियो ।
तत्काल फरार भएकी उनलाई बुधबार बिहान बिर्तामोडबाट पक्राउ
गरिएको प्रहरीले जनाएको छ ।
अनुसन्धानमा खटिएका एक प्रहरी अधिकृतकाअनुसार अस्मितालाई कोशी प्रदेश
प्रहरी कार्यालय विराटनगर र झापा प्रहरीसँगको समन्वयमा पक्राउ गरिएको हो ।
‘उक्त घटनामा आमाको संलग्नता भएको हुनसक्ने
आशंका भएकाले पक्राउ गरिएको प्रहरीले जनाएकाे छ ।
पक्राउ परेकी अस्मितालाई इलाका प्रहरी कार्यालय बेलबारीको हिरासतमा राखेर थप अनुसन्धान भइरहेको छ ।
घटनाको प्रकृति हेर्दा विष खुवाएर दुवै बालिकाको हत्या गरेजस्तो देखिने
मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए । अहिले
प्रहरीले विभिन्न कोणबाट घटनाको अनुसन्धान सुरु गरेको उनले बताए ।
प्रहरीको प्रारम्भिक अनुसन्धानअनुसार निर्माणाधीन घरमा पानी लगाउने विषयमा
अर्जुन र अस्मिताबीच विवाद भएको खुलेको छ । विवाद भएपछि दुई जना नाबालिका
छोरीलाई लिएर अस्मिता शनिबार साँझदेखि घरबाट बेपत्ता थिइन् । पछि,
स्थानीयले नाबालिकाहरूको शव देखेपछि प्रहरीलाई खबर गरेका थिए ।
